އިގްތިސާދީ ކުރިއެރުން މިހާރުގެ އަންދާޒާތަކަށް ވުރެ މަތިވާނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ވޯލްޑް ބޭންކުން ރާއްޖެ ބަނގުރޫޓްވެދާނެ ކަމުގެ ބިރު އޮތް ކަމަށް ބުނެ ނެރެފައިވާ ރިޕޯޓަށްފަހު ޓްވީޓްކުރައްވައި އަމީރުވަނީ ރާއްޖޭގެ އިގްތިސާދީ ދުވެލި ކުރިއަރާފައިވާ މިންވަރު ހާމަކޮށްދީފައެވެ.
މި އަހަރުގެ މިހާތަނަށް ފަތުރުވެރިން ޒިޔާރަތްކުރި މިންވަރު ވަނީ 2022 ވަނަ އަހަރާ އަޅާބަލާއިރު 21.5 އިންސައްތަ އިތުރުވެފަ. ލަފާކުރެވެނީ މި އަހަރު ރެކޯޑު މިންވަރަކަށް ފަތުރުވެރިން ރާއްޖެ ޒިޔާރަތްކުރާނެކަމަށް. ވީމާ އިގުތިސާދީ ކުރިއެރުން މިހާރުގެ އަންދާޒާތަކަށްވުރެ މަތިވާނެ. (6/1)
— Ibrahim Ameer (@iameeru) April 5, 2023
އަމީރު ވިދާޅުވީ މިއަހަރުގެ މިހާތަނަށް ފަތުރުވެރިން ރާއްޖެ ޒިޔާރަތްކުރި މިންވަރު ވަނީ މިދިޔަ އަހަރާ އަޅާބަލާއިރު 21.5 އިންސައްތަ އިތުރުވެފައި ކަމަށެވެ. އެހެންކަމުން މިއަހަރު ރިކޯޑް މިންވަރަކަށް ރާއްޖެއަށް ފަތުރުވެރިން ޒިޔާރަތް ކުރާނެ ކަމަށް އަމީރު ވަނީ ލަފާކޮށްފައެވެ.
ވާލްޑް ބޭންކުން ރާއްޖޭގެ އިގުތިސާދީ ދުވެލީގެ އަންދާޒާ ކުރިއަށްވުރެ ދަށްވާނެކަމަށް ލަފާކޮށްފައިވަނީ، 2021 ވަނަ އަހަރުގެ ޖީޑީޕީ ކުރިއެރި މިންވަރު ކުރިން ވާލްޑް ބޭންކުން އަންދާޒާކުރި މިންވަރަށްވުރެ މަތިވެފައިވާތީ، ހިސާބުކުރުމުގައި އަންނަ ބޭސް އިފެކްޓް އާ ގުޅިގެން. (6/2)
— Ibrahim Ameer (@iameeru) April 5, 2023
އަމީރު އިތުރަށް ވިދާޅުވި ގޮތުގައި ވޯލްޑް ބޭންކުން ރާއްޖޭގެ އިގްތިސާދީ ދުވެލީގެ އަންދާޒާ ކުރިއަށްވުރެ ދަށްވާނެ ކަމަށް ލަފާކޮށްފައިވަނީ، 2021 ވަނަ އަހަރުގެ ޖީޑީޕީ ކުރިއެރި މިންވަރު ވޯލްޑް ބޭންކުން އަންދާޒާ ކުރި މިންވަރަށް ވުރެ މަތިވެފައިވާތީ ކަމަށެވެ. އަދި ހިސާބުކުރުމުގައި އަންނަ ބޭސް އިފެކްޓާ ގުޅިގެން ކަމަށްވެސް އަމީރު ފާހަގަކުރެއްވިއެވެ.
މިއީ ދުނިޔޭގެ ބާޒާރުގައި ތަކެތީގެ އަގުތައް އުފުލިފައި ހުރި ދަނޑިވަޅަކަށްވީނަމަވެސް، ރާއްޖެއަށް މިކަމުގެ އަސަރު ކުރަމުންދާ މިންވަރު އަވައްޓެރި ގިނަ ގައުމުތަކާ އަޅާބަލާއިރު ކުޑަ. (6/3) pic.twitter.com/ZrB0YNnJ4B
— Ibrahim Ameer (@iameeru) April 5, 2023
އަމީރު ވިދާޅުވި ގޮތުގައި މިވަގުތަކީ ދުނިޔޭގެ ބާޒާރުގައި ތަކެތީގެ އަގުތައް އުފުލިފައި ހުރި ދަނޑިވަޅަކަށް ވިނަމަވެސް ރާއްޖެއަށް އެކަމުގެ އަސަރު ކުރަމުންދާ މިންވަރު އަވަށްޓެރި ގިނަ ގައުމުތަކާ އަޅާބަލާއިރުގައި ކުޑައެވެ.
އިންފްލޭޝަން މަތިވާ މިންވަރު ހިފެހެއްޓިފައި ހުރުމުގެ އެއް ސަބަބަކީ ސަރުކާރުން، ތެޔޮ، ކަރަންޓު އަދި ކާޑުގެ އަގު ހެޔޮކުރަން ދެމުންދާ ސަބްސިޑީ ކަމަށްވެސް އަމީރު ފާހަގަކުރެއްވިއެވެ.
ދުނިޔޭގެ ބާޒާރުގެ އަގުތައް އުފުލުމާއެކު ސަބްސިޑީތަކުގެ ހޭދަ ވަނީ ބޮޑުތަނުން އިތުރުވެފައި ކަމަށްވެސް އަމީރު ވިދާޅުވިއެވެ.
ތަކެތީގެ އަގުތައް އުފުލުމާ ގުޅިގެންނާއި މިނޫނަސް ކުރިމަތިވާ ފިސްކަލް ހިރާސްތަކުގެ ތަފްސީލް 2023 ވަނަ އަހަރުގެ ބަޖެޓު ފޮތުގެ ފިސްކަލް ހިރާސްތަކުގެ ބަޔާނުގައި ތަފްސީލުކޮށްފައި ވާނެ ކަމަށާއި އެ ހިރާސްތައް މެނޭޖްކުރުމަށް އަޅަންޖެހޭ ފިޔަވަޅުތައް ދަނީ އަޅަމުން ކަމަށް އަމީރު ވިދާޅުވިއެވެ.
ކޮވިޑް ގެ ހާލަތާ ގުޅިގެން އިތުރުވި އުފެއްދުންތެރިކަމުގެ ނިސްބަތުން ދަރަނީގެ މިންގަނޑު މެދުރާސްތާގައި ދަށަށް ދާނެ ކަމަށް އަމީރު ވިދާޅުވިއެވެ. އަދި އެކަން ހާސިލުކުރަން ސިޔާސަތުތަކަށް ބަދަލުގެންނާނީ ރައްޔިތުންނަށް އެކަންކަމުގެ އަސަރު އެންމެ ކުޑަ ވާނެގޮތަށް ކަމަށް އަމީރު ވިދާޅުވިއެވެ.
ވޯލްޑް ބޭންކުން ނެރުނު ރިޕޯޓްގައި ވާ ގޮތުގައި ރާއްޖޭގެ އިޤުތޞާދީ ކުރިއެރުން ހުންނާނީ 6.6 އިންސައްތައިގައެވެ.
އަދި 2024 ވަނަ އަހަރު އަންނަން ވާއިރަށް ރާއްޖޭގެ އިގްތިސާދު އެވްރެޖްކޮށް ހުންނާނީ 5.6 އިންސައްތައިގައި ކަމަށްވެސް ވޯލްޑް ބޭންކުން ވަނީ ބުނެފައެވެ.
ރާއްޖޭގެ އިގްތިސާދަށް ހުރި ހީރާސްތައް ބޮޑުކަން ފާހަގަކޮށް ވޯލްޑް ބޭންކުން ބުނީ ދުނިޔޭގެ އިގްތިސާދު ބަލިކަށިވެ ހީނަރުވެފައިވާ މި ދަނޑިވަޅުގައި ރާއްޖެއިން ވަނީ ދަރަންޏަށް ފައިސާ ނަގައިފައި ކަމަށެވެ. އަދި އެކަމުގެ ސަބަބުން ރާއްޖޭގެ އިގްތިސާދު ކުރިއަށް އޮތްތަނުގައި ދަށަށް ދާނެ ކަމަށް ބުނެފައެވެ.
ރާއްޖޭގެ އިންފްލޭޝަން މިއަހަރު 5.7 އިންސައްތައަށް މަތިވާނެ ކަމަށްވެސް ވޯލްޑް ބޭންކުން ވަނީ ލަފާކޮށްފައެވެ. އަދި އެކަމުގެ އަސަރު ގޭބިސީތަކަށް ފޯރާ ކާބޯތަކެއްޗާއި ތެލަށް ދެމުންދާ ސަބްސިޑީއާ އެކުގައި ވެސް އަގުތައް އުފުލިގެންދާނެ ކަމަށާއި އެކަން ތަހައްމަލު ކުރާނެ މާލީ ޖާގަ ރާއްޖޭގެ އިގްތިސާދުގައި ނެތް ކަމަށްވެސް ވޯލްޑް ބޭންކުން ވަނީ ބުނެފައެެވެ.