މެދު ހެންވޭރު ދާއިރާގެ މެންބަރު އަލީ އާޒިމަށް ފިޔަވަޅު އެޅުމުން ސާފުވެގެންދިޔައީ އެމްޑީޕީއަކީ، ޒައީމްވަންތަ ޕާޓީއެއްކަންކަމަށް ކުރީގެ ނައިބު ރައީސް ޑރ މުހައްމަދު ޖަމީލް ވިދާޅުވެއްޖެއެވެ.
އާޒިމް އެމްޑީޕީއިން ވަކިކުރީ ޕާޓީގެ އަސާސީ ގަވައިދާއި ހިލާފަށް، އެހެން ޕާޓީތަކާއި އެކު އަދި އެހެން ސިޔާސީ ފިކުރުތަކާއިއެކު މަސައްކަތްކުރައްވަމުން ގެންދަވާތީއެވެ. އާޒިމްއަކީ އެމްޑީޕީގެ ރައީސް މުހައްމަދު ނަޝީދު ސަރުކާރާއި ދެކޮޅަށް، ހިންގަވާ “ފިކުރެއްގެ ދިރުން” އަށް ނިސްބަތްވާ މެންބަރެކެވެ.
އާޒިމް ވަކިކުރުމާއި ގުޅިގެން ކުރެއްވި ޓުވީޓެއްގައި ޖަމީލް ވިދާޅުވީ އާޒިމު ވަކިކުރުމުން ސާފުވީ އެމްޑީޕީއަކީ މިއަދު ސީދާ ޒަޢީމްވަންތަ ޕާޓީއެއްކަންކަމަށެވެ. އަދި ސުވާލު އުފައްދާފައިވަނީ އެ ޕާޓީގެ ރިޔާސީ ވަޢުދު ޕާޓީގެ އަސާސީގަވާއިދުގެ 19 މާއްދާއާ ޚިލާފުތޯއެވެ.
ގޮށްމުށުގެ ބާރު އޯކޭވީތޯ އާއި ކޮރަޕްޝަނާ ދެކޮޅުވުން ކުށެއްތޯވެސް ޖަމީލް ވަނީ އައްސަވާފައެވެ.
އެމްޑީޕީގެ މެދު ހެންވޭރު ދާއިރާގެ މެމްބަރު އަލީ އާޒިމު ވަކިކުރުމުން ސާފުވީ އެމްޑީޕީއަކީ މިއަދު ސީދާ ޒަޢީމްވަންތަ ޕާޓީއެއްކަން. އެޕާޓީގެ ރިޔާސީ ވަޢުދު ޕާޓީގެ އަސާސީގަވާއިދުގެ 19 މާއްދާއާ ޚިލާފުތޯ؟ ގޮށްމުށުގެ ބާރު އޯކޭވީތޯ؟ ކޮރަޕްޝަނާ ދެކޮޅުވުން ކުށެއްތޯ؟ pic.twitter.com/e7RfrzjKwO
— Mohamed Jameel Ahmed (@MJameelAhmed) May 16, 2023
ޖަމީލް ވަނީ އެމްޑީޕީގެ އަސާސީ ގަވާއިދުގައި ރައްޔިތުންގެ ކިބައިން ހޯދާ އަމާނާތެއްގެ މަތިން އެމްޑީޕީ މަސައްކަތްކުރާނީ ދިވެހިރާއްޖޭގެ ވެރިކަން އޭގެ އިންސާފުވެރި ހަމަގޮތުގައިކުރުމަށްކަމަށް ބުނެފައިވާ ބައި ހިއްސާކުރައްވާފައެވެ.
އެމްޑީޕީގައި ތިއްބެވި ސަރުކާރާއި ދެކޮޅު މެންބަރުން ވިދާޅުވަމުންގެންދަވަނީ އަމިއްލަ ޕާޓީގެ ވެރިކަމެއް ނަމަވެސް، ނާއިންސާފުން ގޯސްކޮށް ކަންތައްކުރައްވަނީނަމަ އެވާހަކަދައްކާނެކަމަށެވެ.