މިވެރިކަމުގައި މިވަގުތު ހުރީ “ބޮޑު ކާޓޫނެއް” ކަހަލަ މީހެއްކަމަށް އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ހައުސް އޮފް ޑިމޮކްރެޓްސް އުފެއްދުމަށް ބޭއްވުނު ޖަލްސާގައި ވަހީދު ވިދާޅުވީ ދެވަނަ ދައުރެއްގެ ވާހަކަ ދެއްކުމަށް ރައީސް ސާލިހް ލަދު ނުގަންނަ ކަމަށާއި ދެވަނަ ދައުރެއް ހޯދުމަށް މަސައްކަތްކުރަނީ މިދައުރުގައި އެއްވެސް ކަމެއް ނުކޮށް ކަމަށެވެ.
ރައީސް ނަޝީދުގެ އަރިސް މެމްބަރުންގެ ތެރޭގައި ވެސް ހިމެނޭ ވަހީދު ވިދާޅުވީ ވެރިކަމުގެ ދައުރު ނިމިގެންދާއިރު ވެސް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހްއަށް ރައްޔިތުންގެ ގާތުގައި ވީ ވައުދުތައް އަދިމިހާތަނަށް ފުދިފައިނުވާ ކަމަށެވެ.
އެގޮތުން ދަޑިމޮކްރެޓްސް އުފެދިގެންދިޔައީ ކޮރަޕްޝަނާއި ފިތުނަފަސާދައާއި ވައްކަމާއި ދެކޮޅަށް ތެދުވެ އެއަސާސްތަކުގައި ދެމިތިބުމަށް ކަމަށް ވަހީދު ފާހަގަ ކުރެއްވިއެވެ. އެމްޑީޕީ އިން ވަކާލާތު ކުރަމުންދިޔަ ގިނަ ކަންތައްތައް މިއަދު ވަނީ އަތުންބީވެގެންގޮސް ދީލާލާފައިކަން ފާހަގަކޮށް ވަހީދު ވިދާޅުވީ ދެވަނަ ދައުރެއްގެ ވާހަކަ ދައްކަނީ ލަދުގެކަންފުޅެއްވެސް ނެތީމަ ކަމަށެވެ.
ފަސްއަހަރުގެ އިތުރު ދައުރެއް ހޯދުމަށް ދެވަނަ ދައުރެއް ދިނުމަށް އެދުނު ހަމައެކަނި ވެރިއަކީ ރައީސް ސާލިހް ކަމަށާއި ރައީސް ސާލިހު ނޫން އެހެންގޮތެއް ރައްޔިތުން މިއަދު ބޭނުންވާ ކަމަށް ވެސް ވަހީދު ވަނީ ވިދާޅުވެފައެވެ.