މިއަހަރުގެ ރިޔާސީ އިންތިހާބުގައި ރާއްޖެއިން ބޭރުގައި ތިބެ ވޯޓްލާން ބޭނުންވާ ފަރާތްތަކަށް އޮންލައިންކޮށް އަލުން ރަޖިސްޓަރ ނުވަތަ ރީރެޖިސްޓަރ ނުވެވޭނެ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
އިލެކްޝަންސް ކޮމިޝަންގެ ރައީސް ފުއާދު ތައުފީގު ކުރެއްވި ޓްވީޓެއްގައި ވިދާޅުވެފައިވަނީ ރާއްޖެއިން ބޭރުގައި ތިބެގެން ވޯޓްލާން ބޭނުންވާ ފަރާތްތަކަށް މިފަހަރުގެ ރިޔާސީ އިންތިހާބުގައި އޮންލައިންކޮށް ރީރެޖިސްޓަރ ކުރުމުގެ ފުރުސަތު ހަމަޖައްސައި ދެވިފައިނުވާ ކަަމަށެވެ.
ރިޔާސީ އިންތިހާބާ ގުޅޭ ގޮތުން މައުލޫމާތު ދިނުމަށް އީސީން ބޭއްވި ނޫސްވެރިންގެ ބައްދަލުވުމުގައި ކޮމިޝަންގެ ރައީސް ފުއާދު ތައުފީގު ވިދާޅުވީ ނިމިގެން ދިޔަ ލޯކަލް ކައުންސިލް އިންތިހާބުގައި މާލެ، ހުޅުމާލެ އަދި ވިލިމާލޭގައި ވޯޓުލި މީހުން އަންނަ ރިޔާސީ އިންތިހާބުގައި މާލެ ސަރަހައްދުގައި ވޯޓުލުމަށް ރީ-ރަޖިސްޓާވާން ނުޖެހޭނެ ކަމަށެވެ.
ފުއާދު ވިދާޅުވީ ހުޅުމާލެ އަދި ވިލިމާލޭގައި އުޅޭ މީހުން ބޭނުންނަމަ މާލޭގައި ވޯޓުލުމަށް ރީ-ރަޖިސްޓާވުމުގެ ފުރުސަތު އޮންނާނެ ކަމަށެވެ.
ރިޔާސީ އިންތިހާބު މިއަހަރުގެ ސެޕްޓެމްބަރު ނުވަވަނަ ދުވަހު ބޭއްވުމަށް ހަމަޖެހިފައިވާއިރު 604 ވޯޓު ފޮށި ބަހައްޓަން އިލެކްޝަންސް ކޮމިޝަނުން ނިންމާފައިވެ އެވެ. ދެވަނަ ބުރެއްގައި ވޯޓުލާން ޖެހިއްޖެނަމަ ވޯޓުލުން އޮންނާނީ ސެޕްޓެމްބަރު 30 ވަނަ ދުވަހު އެވެ.