ޖުމްހޫރީ ޕާޓީގެ ރިޔާސީ ކެނޑިޑޭޓު ގާސިމް އިބްރާހީމް މިއަހަރުގެ ރިޔާސީ އިންތިހާބު ކާމިޔާބު ކުރައްވާނީ އެއްބުރުންކަމަށް ގާސިމް އާއި ދާދި ފަހުން ގުޅިވަޑައިގަތް ކުރީގެ ރައީސް ޑރ މުހައްމަދު ވަހީދު ހަސަން މަނިކު ވިދާޅުވެއްޖެއެވެ.
މިލަންދޫގައި ބޭއްވި ގާސިމްގެ ކެމްޕެއިން ޖަލްސާގައި ވާހަކަދައްކަވަމުން ޑރ ވަހީދު ވިދާޅުވީ، އޭނާ ގާސިމްއާއިއެކު ހުންނެވި ސަބަބަކީ ގާސިމްއަކީ މިއަހަރުގެ ރިޔާސީ އިންތިހާބަށް ކުރިމަތިލައްވާފައިވާ ބޭފުޅުންގެ ތެރެއިން އެންމެ ރަނގަޅު ބޭފުޅާއަށްވާތީކަމަށެވެ. ޑރ ވަހީދު ވިދާޅުވީ މި ސަރުކާރުގެ ދަރަނި އެހެން ސަރުކާރުތަކަށްވުރެ ވަރަށް ބޮޑުކަމަށެވެ. އެހާ ގިނަ އަދަދެއް ދަރަނީގެ ގޮތުގައި ހުރީ، ރަހުމަތްތެރިންނާއި ރަށްޓެއްހިންނަށް ބަދަލުގެ ނަމުގައި ފައިސާ ބެހުމުންކަމަށެވެ.
މިކަމުގެ ސަބަބުން ގައުމު އޮތީ ވަރަށް ނުރައްކާ ހާލަތެއްގައިކަމަށް ފާހަގަކޮށް ޑރ ވަހީދު ވިދާޅުވީ މި ސަރުކާރަށް ދެވަނަ ދައުރެއް ދެއްވައިފިނަމަ ގައުމު ހާލަތު ވަރަށް ގޯސްވެގެންދާނެކަމަށެވެ.
އަޅުގަނޑު ގަބޫލުކުރާ ގޮތުގައި މިކަން ކުރެވޭނެ އެހެން ކެނޑިޑޭޓަކު ނެތީ، އެހެންވެގެން ގާސިމްގެ ފަހަތުގައި މިހުރީ.
ޑރ ވަހީދު ވިދާޅުވިއެވެ.
މިއަހަރުގެ ރިޔާސީ އިންތިހާބު ގާސިމް ކާމިޔާބު ކުރައްވާނީ އެއްބުރުންކަމަށް ފާހަގަކޮށް ޑރ ވަހިދު ވިދާޅުވީ، ފުރުސަތު ދޭންޖެހޭ ހަމައެކަނި ކެނޑިޑޭޓަކީ ގާސިމްކަމަށެވެ. ޑރ ވަހީދު ވިދާޅުވީ ހަމަޖެހިގެން ގޭގައި މަޑު ކުރެވެން އޮތް ނަމަވެސް ނިކުމެވަޑައިގެން އެ ހުންނެވީ ރާއްޖެއަށް ދިމާވި ނުރައްކާތަކުން ގައުމު ސަލާމަަތްކުރަން މީގެ ކުރިން ކުރި ބުރަ މަސައްކަތުން ހޯދައިދިން ހައްގުތައް ގެއްލިގެންދާތީ އެ ހައްގުތައް ރައްޔިތުންނަށް އަނބުރާ ކަށަވަރުކޮށްދިނުމަށްކަމަށެވެ.
އެގޮތުން ޑރ ވަހީދު ގައުމުގެ ސަލާމަތާއި މިނިވަންކަން ގާއިމްކުރުމަށްޓަކައި ގާސިމްއާއިއެކު ގިނަ މަސައްކަތްތަކެއް ކުރެވިފައި އެބަހުރިކަމަށެވެ. އެގޮތުން ޖީއެމްއާރުގެ ފަރާތުން މައި އެއާޕޯޓު ހޯދުންވެސް ފާހަގަކުރެއްވިއެވެ. އަދި ރާއްޖޭގެ ހަރު މުދާތައް އެހެން ފަރާތްތަކުގެ އަތް މައްޗަށް ނުގޮސް ހިފެހެއްޓުމަށްވެސް ގިނަ މަސައްކަތްތަކެއް ކުރެވިފައިވާނެކަމަށް ފާހަގަކޮށް ޑރ ވަހީދު ވިދާޅުވީ، އެހެންކަމުން ފަހަތަށް ޖެހެވެން ނެތްކަމަށެވެ.