ރައީސް މުއިއްޒު އަޒުލު ކުރުމުގެ މަސައްކަތް ހުއްޓާލުމަށް ގާސިމް ގޮވާލައްވައިފި

ރައީސުލްޖުމްހުރިއްޔާ ޑރ. މުހައްމަދު މުއިއްޒު އަޒުލު ކުރުމުގެ މަސައްކަތް ހުއްޓާލުމަށް މާމިގިލީ ދާއިރާގެ މެމްބަރު ގާސިމް އިބްރާހިމް ގޮވާލައްވައިފިއެވެ.

ގާސިމް މިހެން ވިދާޅުވީ ރައީސް އަދި ނައިބު ރައީސް ވަކިކުރުމުގެ ގަވާއިދަށް އެމްޑީޕީގެ މެޖޯރިޓީގެ ތާއީދާއިއެކު ގެނައި ބަދަލުތަކުގެ ސަބަބުންނެވެ.

އެގޮތުން އިސްލާހުތަކާއިއެކު، އަޣުލަބިއްޔަތު ގުނުމާއި ގުޅޭ ބަދަލެއް ގެނެސްފައިވެއެވެ. އެގޮތަށް ބަދަލު ގެނެސްފައި ވަނީ އައު ސަރުކާރުގެ މަގާމުތަކަށް އައުމަށްޓަކައި، މަޖިލީހުގެ މެމްބަރުންގެ ގޮތުގައި ތިއްބެވި ހަތް ބޭފުޅަކު އިސްތިއުފާ ދެއްވުމުންނެވެ. އަދި ގަވައިދު ކޮމިޓީން ނިންމާފައި ވަނީ މަޖިލީހުގެ ޖުމްލަ މެމްބަރުންނަކީ އެއީ އެވަގުތަކު މަޖިލީހުގައި ދެމިތިބި މެމްބަރުންކަމަށެވެ. އެހެންކަމުން ދެން މެންބަރުން ގުނުމުގައި ބަލާނީ މަޖިލީހުގައި ތިއްބެވީ 80 މެމްބަރުންކަމަށެވެ.

މާނައަކީ އެ ބަދަލާއި އެކު ކަންކަން ފާސްކުރުމުގައި ބަލާ އަޣުލަބިއްޔަތަށް ބަދަލުތަކެއް އައިސް، ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބު އަޒުލު ކުރުމަށް 54 މެމްބަރުންގެ ވޯޓު ބޭނުންވުމެވެ. މީގެ ކުރިން ގަވައިދު އޮތް ގޮތުން އެކަމަށް ބޭނުން ވާނީ 58 މެމްބަރުންގެ ވޯޓެވެ. މަޖިލީހުގައި މިވަގުތު އެމްޑީޕީގެ 56 މެމްބަރުން އެބަތިއްބެވެ.

ރައީސް ޑރ މުއިއްޒު ރައީސުލްޖޫމްހޫރިއްޔާކަމުގެ ހުވާ ކުރެއްވި ފަހުން އަދި މާ ގިނަ ދުވަހެއް ނުވާކަން ފާހަގަކުރައްވާ ގާސިމް ވިދާޅުވީ ރައީސް މުއިއްޒު އަޒުލުކުރަން ކުރާ މަސައްކަތް ހުއްޓާލަންޖެހޭކަމަށެވެ. އެގޮތުން ސަރުކާރު އަދި ރަނގަޅަށް ފަށައިނުގަނެވިގެން އުޅޭކަން ފާހަގަކުރެއްވިއެވެ.

އެގޮތުން މިނިސްޓްރީތަކުގެ މެންޑޭޓު އޭރު މަޖިލީހަށް ފޮނުވާފައިނުވާކަމާއި، ވަޒީރުންނަށް ރުހުންދީފައި ނުވާކަމަށް ވިދާޅުވިއެވެ. އެހެންކަމުން ސަރުކާރަށް ފުރުސަތު ދޭން ޖެހޭކަމަށް ގާސިމް ގަބޫލު ކުރައްވައެވެ.