ރިޔާސީ އިންތިހާބުގެ ދެވަނަ ބުރުގައި ވޯޓުލުމަށް ރީ ރެޖިސްޓްރީ ކުރި މީހުންގެ އަދަދާއިމެދު ޕީއެންސީގެ ނައިބުރައީސް އިބްރާހިމް ޝުޖާއު ކަންބޮޑުވުން ފާޅުކުރައްވައިފިއެވެ.
ސެޕްޓެމްބަރު 30 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގެ ވޯޓުލުމުގެ ދެވަނަ ބުރަށް 25،000 މީހުން ރީ ރެޖިސްޓްރީކޮށްފައިވާކަމަށް އިލެކްޝަންސް ކޮމިޝަނުން އިއުލާނުކޮށްފައިވާކަމަށް ޝުޖާއު ވިދާޅުވިއެވެ. އޭނާ ވިދާޅުވީ، އެ އަދަދަށް މީހުން ރީރެޖިސްޓްރީ ކުރިކަމަށް ބުނުމަކީ ބޮޑު އޮޅުވާލުމެއްކަމަށެވެ. އޭނާ ވިދާޅުވީ އެއީ ހިންގާފައިވާ ވައްކަމެއްކަމަށެވެ.
ޝުޖާއު ވިދާޅުވީ، އެ އަދަދަށް މީހުން ރީރެޖިސްޓީ ކޮށްފައިނުވާކަމަށެވެ. އޭނާ ވިދާޅުވީ، އިއުލާނުކޮށްފައިވާ އަދަދަށް މީހުން ރީ ރެޖިސްޓްރީކޮށްފައިނުވާކަން އިލެކްޝަންސް ކޮމިޝަނުގެ ތެރެއިން އިތުބާރު ހުރި މަސްދަރަކުން ލިބިފައިވާކަމަށެވެ.
25،000 ދިވެހިން ރީ-ރެޖިސްޓްރީ ކުރި ކަމަށް @ElectionsMv އިން އިއުލާން ކުރުމަކީ ބޮޑު އޮޅުވާލުމެއް.ވައްކަމެއް.އެއަދަދަށް ރީ-ރެޖިސްޓްރީ ކޮށްފައި ނުވޭ.އެމަޢުލޫމާތު އަޅުގަނޑުމެނަށް @ElectionsMv ތެރެއިން ލިބިއްޖެ.މިވައްކަން ހުއްޓުވަން އެންމެހާ ރައްޔިތުން މިއަދު 13:00 އަށް @ElectionsMv…
— Ibrahim Shujau (@IbrahimShujaau) September 17, 2023
އޭނާ ވިދާޅުވީ އެކަން ހުއްޓުވުމުގައި ރައްޔިތުން ބައިވެރިވުމަށް ގޮވާލާކަމަށެވެ. އެގޮތުން އިލެކްޝަންސް ކޮމިޝަން ގާތަށް މީހުން އެއްވެ ޝުއޫރު ފާޅުކުރުމަށް އޭނާވަނީ މިއަދުގެ 13:00 އަށް ދައުވަތު އަރުވާފައެވެ. ޝުޖާއު ވިދާޅުވީ، އިލެކްޝަންސް ކޮމިޝަންގެ ރައީސް ފުއާދު ތައުފީގު އަދި ނައިބުރައީސް އިސްމާއިލް ހަބީބުގެ ހަރަކާތްތައް ގާތުން ބައްލަވަމުންދާކަމަަށެވެ. އެހެންކަމުން ވައްކަން ނުކުރެއްވުމަށް އޭނާވަނީ އިލްތިމާޒްކުރައްވާފައެވެ. ޝުޖާއު ވިދާޅުވީ، ހިންގާ އަމަލުތަކަށް ޖަވާބުދާރީ ކުރުވާނެކަމަށެވެ.