2023 ވަނަ އަހަރުގެ ރިޔާސީ އިންތިހާބުގެ ދެވަނަ ބުރު “ވަގަށް ނަގައިގެން” ދެ ވަނަ ދައުރެއް ކާމިޔާބުކުރުމަށް ރައީސް އިބްރާހިމް މުހައްމަދު ސާލިހު ރާވާފައިވާކަމަށް ޕީޕީއެމްގެ ނައިބުރައީސް އަހުމަދު ޝިޔާމް ވިދާޅުވެއްޖެއެވެ.
ޝިޔާމް ސޯޝަލްމީޑިއާއަށް ކުރެއްވި ޕޯސްޓެއްގައި އޭނާ ވަނީ ރީ ރެޖިސްޓްރީ ކުރުމަށް ހުޅުވާލި ދެ ދުވަހުގެ ތެރޭގައި 25،000 އަށް ވުރެ ގިނަ މީހުން ރެޖިސްޓްރީ ބަދަލުކޮށްފައިވާކަމަށް އިލެކްޝަންސްއިން އިއުލާނުކުުރުމާއިއެކު،
ޕީއެންސީގެ ރައީސް އަބްދުއްރަހީމް އަބްދުﷲ އެކަމާއި ކަންބޮޑުވުން ފާޅުކުރައްވާ ވީޑިއޯއެއް ހިއްސާކޮށްފައެވެ. އެ ވީޑިއޯގައި އަބްދުއްރަހީމްވަނީ މީގެ ކުރިން އެއްފަދަ ހާލަތެއްގައި ރީ ރެޖިސްޓްރީއަށް 7 ދުވަސް ދިނުމުން 20،000 މީހުންވެސް ހަމަނުވާކަމަށް ފާހަގަކުރައްވާފައެވެ.
އޭނާ ވިދާޅުވީ، އެހެންކަމުން ދެ ދުވަސްތެރޭގައި ފަންސަވީސް ހާސް މީހުން ރެޖިސްޓްރީ ބަދަލުކުރިކަމަށް ބުނަނީ ވަގަށާއި އެހެނިހެން ގޮތް ގޮތުން މީހުންގެ ނަމުގައި ފޯމުލުން ފަދަ އަމަލުތައް ހިންގައިގެންކަމަށާއި އެއީ ހިންގާފައިވާ ވައްކަމެއްކަމަށް ވިދާޅުވިއެވެ.
އަބްދުއްރަހީމްގެ ވާހަކަތަކަށް އަލިއަޅުއްވައި ޝިޔާމް ވިދާޅުވީ، އިންތިހާބުގެ ފުރަތަމަ ބުރުން ރައީސް ސާލިހު ބަލިވުމުން ދެވަނަ ބުރުގައި އިންތިހާބު ވަގަށް ނަގަން ވިސްނާފައިވާކަމަށެވެ. އެހެންނަމަވެސް އެކަން ކުރުމަށް ރައްޔިތުން ފުރުސަތެއް ނުދޭނެކަމަށާއި ރައްޔިތުން ތިބީ ގައްދާރުން ވެރިކަމުން ބޭލުމަަށްކަމަށްވެސް އޭނާ ވިދާޅުވިއެވެ.
ޝިޔާމް ވިދާޅުވީ، އިންތިހާބު ވަގަށް ނެގުމަށް މަސައްކަތްކުރަމުންދާކަން ފަޅާ އަރާފައިވާކަމަށްވުމުން ބޭރު ގައުމުގެ ސިފައިން އަރުވަންވެސް ފަސްނުޖެހޭނެކަމަށް ބެލެވޭކަމަށެވެ.