ސެޕްޓެމްބަރ 30 ގައި ބޭއްވުމަށް ހަމަޖެހިފައިވާ ރިޔާސީ އިންތިހާބުގެ ދެވަނަ ބުރުގައި ޖުމްހޫރީ ޕާޓީ (ޖޭޕީ) އިން އިދިކޮޅުގެ ރިޔާސީ ކެންޑިޑޭޓު ޑރ މުހައްމަދު މުއިއްޒަށް ތާއީދުކޮށްދިނުމަށް ޕީޕީއެމްގެ އެޑްވައިޒަރު ޑރ. މުހައްމަދު ޝަހީމް އަލީ ސައީދު އެދިވަޑައިގެންފިއެވެ.
ދެވަނަ ބުރަށް ޑރ މުއިއްޒު ދަތުރުކުރުމާއިއެކު އިދިކޮޅުން ވަނީ ޖޭޕީގެ ތާއީދު ހޯދުމަށް އެ ޕާޓީގެ ލީޑަރ ގާސިމް އިބްރާހީމްގެ އަރިހަށް ވަޑައިގެންފައެވެ. ނަމަވެސް ޖޭޕީއިން ނިންމީ އެއްވެސް ކެންޑިޑޭޓެއްގެ ފަހަތަށް ނޭރުމަށެވެ. އަދި އެއީ ވެރިކަމަށް އައުމަށްފަހު، ސަރުކާރުގައި ހުރި މައްސަލަތައް ހައްލުކުރުމުގެ ފުރުސަތު ޖޭޕީއަށް ނުދޭތީކަމަށް ގާސިމް ވިދާޅުވިއެވެ. ޖޭޕީއިން ވަކި ކެންޑިޑޭޓެއްގެ ފަހަތަށް ނޭރުމަށް ނިންމި ނަމަވެސް، އެ ޕާޓިގެ އާންމު މެންބަރުންނަށް ބޭނުން ކެންޑިޑޭޓަކަށް ތާއީދުކުރުމުގެ ފުރުސަތު އޮންނާނެކަމަށް ގާސިމް ވިދާޅުވިއެވެ.
މިކަމާއި ގުޅިގެން ޑރ ޝަހީމް އެދިވަޑައިގަތީ ޖޭޕީގެ މެންބަރުން ޑރ މުއިއްޒަށް ތާއިދު ކުރެއްވުމަށެވެ.
JP ge Emmehaa aammu Memberun Dr @MMuizzu ah Thaaidhukohdhevumah nuhanu Adhabu Ihuthiramaa eku edhen. Alhuagndumen emmen gulhigen Mi Qaumu tharaqeekoh binaakureveyne. Insha Allah. https://t.co/SWcp28nytG
— Mohamed Shaheem Ali Saeed (@Mohamedshaheem1) September 17, 2023
ރިޔާސީ އިންތިހާބުގައި ވާދަ ކުރެއްވި 8 ކެންޑިޑޭޓުންގެ ތެރޭއިން ފަސްވަނައިގައި ގާސިމް ހުންނެވީ 5،460 ވޯޓާއިއެކުއެވެ. ފުރަތަމަ ބުރުގައި ޑރ މުއިއްޒަށް 101،635 ވޯޓު ލިބިވަޑައިގެންނެވިއެވެ. ދެވަނަ ބުރުގައި ޑރ މުއިއްޒާއި ވާދަ ކުރައްވާނީ އެމްޑީޕީގެ ކެންޑިޑޭޓް އިބްރާހިމް މުހައްމަދު ސޯލިހެވެ. އެމަނިކުފާނަށް ލިބިވަޑައިގެންނެވީ 86،161 ވޯޓެވެ.
މިހާތަނަށް ޕީޕިއެމް/ޕީއެންސީއާއިއެކު ކޯލިޝަން ހައްދަވާފައިވަނީ ހަމައެކަނި އެމްއެންޕީއިންނެވެ. ރައީސް ސާލިހާއިއެކު އަދިވެސް އެމްޑީއޭ އަދި އަދާލަތު ޕާޓީ އެބައޮތެވެ.