ފިނޭންސް މިނިސްޓްރީގެ ޕްރޮކިއުމަންޓް ވެރިއެއްގެ ގޮތުގައި މަސައްކަތް ކުރަމުންދަނިކޮށް ކުއްލި ގޮތަކަށް ނިޔާވި އަހުމަދު މުޖުތަބާގެ ނަމުގައި މިނިސްޓްރީގެ ފްލޯއެއް ހާއްސަ ކޮށްފިއެވެ.
އެގޮތުން ފިނޭންސް މިނިސްޓްރީން ގާއިމް ކުރި ޕްލޯގައިވަނީ މުޖުތަބާ ޕްލޯގެ ނަމުން ނަންބޯޑެއްވެސް ހަރުކޮށްފައެވެ.
މުޖުތަބާ އަކީ ދައުލަތަށް 14 އަހަރު ހިދުމަތް ކުރެއްވި ބޭފުޅެކެވެ. މުޖުތަބާ ހިދުމަތާއި ގުޅިވަޑައިގަތި 2008 ވަނަ އަހަރުގައެވެ. މުޖުތަބާ ނިޔާވި އިރު ހުންނެވީ ފިނޭންސް މިނިސްޓްރީގެ ޗީފް ޕްރޮކިއުމަންޓް އެގްޒެކެޓިވް އަދި ހެޑް އޮފް ޕްރޮކިއުމަންޓް ޕޮލިސީ ޑިޕާޓްމަންޓުގެ މަގާމުގައެވެ.
މުޖުތަބާ ނިޔާވީ މިދިޔަ އަހަރު ޖުލައި މަސްތެރޭގައެވެ. އޭރު އޭނާގެ ހުންނެވީ އުފަން ރަށް ގއ. ދެއްވަދޫގައި ޗުއްޓީއަށް ގޮހެވެ. އޭނާ ޗުއްޓީގައި ހުންނަވަނިކޮށް ކުއްލިއަކަށް ބަޑުގައި ރިއްސާ ހާލު ދެރަވުމާއި ގުޅިގެން ފަރުވާ ދިނުމަށް ގދ. ތިނަދޫ ގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލުގައި ފަރުވާދިނުމަށްފަހު މާލެ ގެނެސް އައިޖީއެމްއެޗްގައި ފަރުވާ ދެމުންދަނިކޮށް ނިޔާވީއެވެ.
މިއަދު ފިނޭސުން ކުރެއްވި ޓްވީޓެއްގައި ވިދާޅުވީ މަރްޙޫމް އެކުވެރިޔާ މުޖުތަބާ ދޫކޮށްލެއްވި ނަމޫނާ ތަރިކަގެ ހަނދާނުގައި، މިނިސްޓްރީގެ 1 ވަނަ ފަންގިފިލާ، އެމަނިކުފާނުގެ ޝަރަފުގައި ޚާއްޞަކުރެވިފައިވާ ކަމަށެވެ.