ރާއްޖެއާއި ދެމެދު އޮތް ގުޅުން ހީނަރުވެގެންދިއުމުގައި އިންޑިއާގެ ފަރާތުން އެއްވެސް އިހުމާލެއް ވެފައިނުވާނެކަމަށް އެ ގައުމުގެ މަޖިލިސް މެމްބަރު ޝަޝީ ތަރޫރް ވިދާޅުވެއްޖެއެވެ.
އިންޑިއާގެ ނޫސްތަކުން ރިޕޯޓުކުރާގޮތުން އެ ގައުމުގެ މަޖިލިސް މެމްބަރަކުވަނީ ރާއްޖޭގައި ތިބި ސިފައިން ބޭލުމަށް ކުރަމުންދާ މަސައްކަތްތަކުގެ ސަބަބުން އުފެދިފައިވާ މައްސަލައިގައި އެ ގައުމުގެ އިހުމާލެއް ނެތްކަމަށް ވިދާޅުވެފައެވެ. އަދި މައްސަލަތައް އުފެދިފައިވަނީ ރާއްޖޭގައި އަލަށް ގާއިމުވެފައިވާ ސަރުކާރުގެ ސަބަބުންކަމަށް ސިފަކޮށްފައިވާކަންވެސް ފާހަގަކުރެވެއެވެ.
ތަރޫރް ވިދާޅުވެފައިވާގޮތުގައި ބައިނަލްއަގުވާމީ މައިދާނުގައި ޝުކުރުވެރިކަމަކީ ދިގު މުއްދަތަކަށް ދެމި އޮންނަ އެއްޗެއް ނޫނެކަމަށެވެ. އަދި އިންޑިއާއިންވަނީ ރާއްޖެއަށް އެތައް ކަމެއް ކޮށްދީފައިކަމަށާއި އެކަންކަމުގެ ތެރޭގައި ބަގާވާތެއް ހުއްޓުވުމާއި ފެނުގެ ސަޕްލައި ފޯރުކޮށްދިނުންވެސް ހިމެނޭކަމަށެވެ. އެހެންމަަވެސް މިފަދަ ގުޅުންތައް ބައްޓަންކުރުމުގައި އެފަދަ އަމަލުތައް މާ ބޮޑު ދައުރެއް އަދާނުކުރާކަމަށް އޭނާ ވިދާޅުވެފައިވެއެވެ.
އޭނާ ވިދާޅުވެފައިވާ ގޮތުގައި ޖުމުލަގޮތެއްގައި ބޯޑަރު ސަަރަހައްދުތަކުގައި ކަންކަން ކުރިއަށް ދަނީ ރަނގަޅަށެވެ. އަދި މައްސަލަތައް ދިމާވާނަމަވެސް އެ ހުރިހާ މައްސަލައަކީ އިންޑިއާ ސަަބަބުން ކުރިމަތިވެގެން އަންނަ މައްސަލަތައް ނޫންކަމަށް ބުނެފައިވާއިރު، ހާރިޖީ މަސައްކަތްތަކުގެ ތެރެއިންވެސް އެ ގައުމުގެ މަސްލަހަތާއި ޝައުގުތައް އިސްކުރުމަށްވެސް ގޮވާލާފައިވެއެވެ.