ރާއްޖެއާއި އިންޑިއާ ދެމެދު އުފެދިފައިވާ ނުތަނަވަސްކަމަށްޓަކައި ދިވެހި ރައްޔިތުންގެ ފަރާތުން ކުރީގެ ރައީސް މުހައްމަދު ނަޝީދު އިންޑިއާގައި މާފަށް އެދިވަޑައިގެންފިއެވެ.
އިންޑިއާގައި ހުންނަވައި ދިވެހިރާއްޖެއާއި އެ ގައުމުގެ ދެމެދު އުފެދިފައިވާ މައްސަލަތަކުގެ ސަބަބުން ރާއްޖެއަށް ބޮޑެތި ނޭދެވޭ އަސަރުތައް ކުރަމުންދާކަމުގެ މައްޗަށް ރައީސް ނަޝީދު އަލިއެޅުއްވިއެވެ. އެގޮތުން އިންޑިއާގެ ބަޔަކު މީހުން ދިވެހިރާއްޖެ ބޮއިކޮޓްކުރުމަށް ގޮވާލާާ ސޯޝަލްމީޑިއާގައި ހިންގި ކެމްޕެއިންގެ ސަބަބުން ދިވެހި ފަތުރުވެރިކަމުގެ ސިނާއަތަށް އެކަމުގެ ލޮޅުންތައް އައިސްފައިވާކަމަށް ފާހަގަކުރެއްވިއެވެ.
ރައީސް ނަޝީދު ވިދާޅުވީ، އުފެދިފައިވާ މައްސަލައާއިމެދު ކަންބޮޑުވެވަޑައިގަންނަވާކަމަށާއި ދިވެހި ރައްޔިތުން މިކަމަށްޓަކައި މާފަށް އެދޭކަން ހިއްސާކުރައްވަން ބޭނުންވަވަޑައިގަންނަވާކަމަށްވެސް ވިދާޅުވިއެވެ. އެމަނިކުފާނު ވިދާޅުވީ، މައްސަލަތަކެއް ދިމާވެފައިވާކަމަށް މާފަށް އެދިވަޑައިގަންނަވާކަމަށެވެ.
ރައީސް ނަޝީދު ވިދާޅުވީ، އިންޑިއާ މީހުން ރާއްޖެއަށް ފަތުރުވެރިންގެ ގޮތުގައި އައުމަށް ދިވެހިން ބޭނުންވާކަމަށާއި ކުރިން މެހެމާންދާރީ އަދާކުރުމާއި ހިދުމަތްތައް ދެމުންދިޔަ ގޮތްތަކާއި އުސޫލުތަކަށްވެސް ބަދަލެއް ނާންނާނެކަމަށް ވިދާޅުވިއެވެ.
އެމަނިކުފާނު ވިދާޅުވީ، ސިޔާސީ އެކްޓިވިސްޓުންގެ ވިސްނުން ގެންގުޅޭ ދަށު ފަންތީގެ ސަރުކާރުގެ އޮފިޝަލުންތަކެއް މިފަދަ ގޮތަކަށް ޝުއޫރުތަކެއް ފާޅުކޮށްފައިވާކަމަކީ އިންތިހާއަށް ދެރަ މައްސަލައެއްކަމަށެވެ. އެހެންނަމަވެސް ރައީސް ޑރ މުހައްމަދު މުއިއްޒު އެ މީހުން މިހާރު ސަސްޕެންޑުކޮށްފައިވާކަަމަށްވުމުން ކޮންމެވެސް ވަރެއްގެ ހިތްހަމަޖެހުމެއް ލިބިވަޑައިގެންނެވިކަމަށް ހިއްސާކުރެއްވިއެވެ.
ރައީސް ނަޝީދު ވިދާޅުވީ، ރާއްޖެއާއި އިންޑިއާ ދެމެދު އުފެދިފައިވާ މައްސަލަތައް ހައްލުކުރަންޖެހޭކަމަށެވެ. އަދި ކުރިއަށް އޮތް ގުޅުމަށް އަނބުރާ ދިއުމަށްޓަކައި މިހާރު އޮތް މިސްރާބު ބަދަލުކުރަންޖެހޭކަމަށް ފާހަގަކުރެއްވިއެވެ.