ރުހުން ނުދިން ވަޒީރުންތައް އަލުން އައްޔަނުކުރުމަކީ ގާނޫނުއަސާސީގެ ހުރުމަތް ކެނޑުން: ޑިމޮކްރެޓްސް

ރައްޔިތުންގެ މަޖިލީހުން ރުހުން ނުދިން ވަޒީރުންތަކެއް އަލުން އައްޔަންކުރުމަކީ ގާނޫނުއަސާސީގެ ހުރުމަތްކަނޑާލުން ކަމަށް ދަ ޑިމޮކްރެޓްސް އިން ބުނެފިއެވެ. 

ރުހުން ނުދޭ ވަޒީރުން އަލުން މަގާމަށް އައްޔަނު ކުރި މައްސަލައިގައި ޑިމޮކްރެޓްސްއިން ނެރުނު ނޫސްބަޔާނުގައި ބުނެފައިވަނީ ރައްޔިތުންގެ މަޖިލީހަށް އެ ވަޒީރުންގެ ނަންތަކެއް އަލުން އަނބުރާ ނުފޮނުވޭނެ ކަމަށެވެ. 

އަދި ހަމައެހެންމެ، ރައްޔިތުންގެ މަޖިލީހުން ރުހުން ނުދިން މީހަކު ބަންޑާރަނައިބުގެ ހައިސިއްޔަތާ އަމިއްލަ ޒާތީ ތައައްސުބުގެ ދެމެދުގައި ތާށިވެ ހުރެގެން، ގާނޫނުއަސާސީގެ އިންތަކާ މިންތަކުން ބޭރުން ގާނޫނީ ލަފަޔާއި ރައުޔުތައް ނެރި، ދައުލަތް ތަމްސީލު ނުކެރޭވެ ކަމަށް އެޕާޓީން ވަނީ ބުނެފައެވެ. 

ދަ ޑިމޮކްރެޓްސް އިން ރައީސް ޑރ. މުޙައްމަދު މުއިއްޒުގެ އަމަލުތައް ބަލައި ނުގަންނަ ކަމަށް ވަނީ ބުނެފައެވެ. އެ ޕާޓީން ވަނީ ގާނޫނުއަސާސީގެ ހުރުމަތާއި، ދުނިޔޭގެ ޑިމޮކްރެޓިކް ހަމަތަކާއި، ގާނޫނީ ދައުލަތްތަކުގެ ނިޒާމުތައް ރޭވިފައި އޮންނަ އެންމެ އަސާސީ މަފްހޫމުތަކަށް ކުޑައިމީސް ނުކުރެއްވުމަށް ބުނެފައެވެ. 

މަޖިލީހުން ރުހުން ނުދޭން ނިންމާފައި ވަނިކޮށް ބަންޑާރަ ނައިބު އަހުމަދު އުޝާމް އާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދުގެ އިތުރުން ހައުސިން މިނިސްޓަރު ޑރ. އަލީ ހައިދަރަށް ރުހުންނުދޭން ރައްޔިތުންގެ މަޖިލީހުން ފާސްކޮށްފައި ވަނިކޮށް އަލުން މަގާމަށް ވަނީ އައްޔަނު ކުރައްވާފައެވެ.