ޕީއެންސީގެ ރައީސް ޢަބްދުއްރަޙީމް ޢަބްދުﷲ ރައީސުލްޖުމްހޫރިއްޔާއަށް 06 ސުވާލެއް އަމާޒުކުރައްވައިފިއެވެ.
ރައީސް ޞާލިޙަށް ޓެގްކުރައްވައި ޢަބްދުއްރަޙީމް މިއަދު ކުރެއްވި ޓްވީޓެއްގައި ވަނީ ޤައުމަށް ހެޔޮއެދިވަޑައިގެން ކުރެއްވި ކަންތައްތަކެއްތޯ އައްސަވައި އެކި ދިމަދިމާއިން 05 ސުވާލު އަމާޒުކުރައްވާފައެވެ. ޢަބްދުއްރަޙީމް މިހެން ވިދާޅުވީ ހުކުރުދުވަހުގެރޭ ހެންވޭރުކޮޅުގައި ހިނގި އަލިފާނުގެ ހާދިސާ ހިނގިތަނަށް ވަޑައިގެން ރައީސް ޞާލިޙް ދެއްކެވި ވާހަކަފުޅާއި ގުޅިގެންނެވެ.
ރައީސް ޞާލިޙް ވިދާޅުވީ ބަލި ފެތުރުމުގައި އެންމެ ބޮޑު މައްސަލަައަކަށް މިވަނީ އެންމެން އެއްތަނަކަށް ޖަމާވެ ގައިދުރުކަމެއްނެތި އުޅުންކަމަށެވެ. އަދި އެއާއި ޚިލާފަށް ޤަވާއިދުތަކާއި އެއްގޮތަށް ޢަމަލުކުރާ ފަރާތްތައް އުޅޭކަމަށާއި ނަމަވެސް މިއަދު ވެސް މާލޭގައި ބަޔަކު މުޒާހަރާކޮށްފައިވާ ކަމަށާއި ވަރަށް ގިނަ ފަރާތްތަކުން މާސްކު ވެސް ނާޅުއްވާ އުޅުއްވި މަންޒަރު ފެންނިގެން ހިނގައްޖެކަމަށް ވެސް ރައީސް ޞާލިޙް ވިދާޅުވިއެވެ. އަދި އެއީ ވަރަށް ހިތާމަވެރި ކަމެއްކަމަށް ވެސް ރައީސް ޞާލިޙް ވިދާޅުވިއެވެ.
ރައީސްގެ މި ވާހަކަތަކާއި ގުޅިގެން ޢަބްދުއްރަޙީމް ވަނީ 08 ފެބްރުއަރީގައި މުޅި ޤައުމުގައި ހުޅުޖެހީ ޤައުމަށް ހެޔޮއެދިގެންތޯއާއި ފަތުރުވެރިން ނާންނަން މުޅި ދުނިޔޭތެރޭ ދުވީ ހެޔޮއެދިގެންތޯ ސުވާލުކުރައްވާފައެވެ. އަދި ދިވެހި ރާއްޖެއަށް ދަތިކުރުމުގެ ފިޔަވަޅު އަޅަން ގޮވީ ހެޔޮއެދިގެންތޯއާއި ބޭރުގެ ބާރުތަކުން ރާއްޖެ ހިފުމަށް ގޮވަމުން ދިޔައީ ހެޔޮއެދިގެންތޯ ވެސް ސުވާލުކުރެއްވިއެވެ.
Gaumah heyo edhigenthoa 8 feb 2012 ga mulhi gaumugai hulhu jehee? Fathuruverin naannan govamun dhuniyey therey dhuvee?dhivehi raajje ah dhathi kurumuge fiyavalhu alhan govee? Beyruge baaruthakun araa raajje hifan govamun dhiya’ee?dhawlathuge kh’azaanaa thiya dhovelanee?@ibusolih
— Abdul Raheem Abdulla (@Banafsaa) August 29, 2020
ހަމައެއާއެކު ދަޢުލަތުގެ ޚަޒާނާ ދޮވެލަމުން ތިޔަ ގެންދަވަނީ ކީއްވެތޯއާއި 1988 ގެ ނޮވެމްބަރު 11 ގައި ރައީސް ޞާލިޙްގެ ބަފައިބެ އަޑީގައި ހުރެގެން ރާއްޖެއަށް ޓެރަރިސްޓުން ފޮނުވައިގެން ކުށެއްނެތް މައުސޫމް 19 ދިވެހިން ޝަހީދުކޮށްލީ ހަމަ ދިވެހި ޤައުމާއި ރައްޔިތުންނަށް ހެޔޮއެދިގެންތޯ ވެސް ޢަބްދުއްރަޙީމް ވަނީ ރައީސް ޞާލިހާއި ސުވާލުކުރައްވާފައެވެ.
@ibusolih manikfaanuge bafaibe adeegai huregen mi gaumah terroristun fonuvaigen kusheh neiy mausoom 19 Dhivehin shaheed kohlee hama Dhivehi gaumaai rayyithunnah heyo edheythee thoa? Hama saafu kohlah dhannavaalee.@DhiyaresNews @avasmv @dhenonline @Ch13official @AdhivesOnline
— Abdul Raheem Abdulla (@Banafsaa) August 29, 2020
ރައީސް ޞާލިޙަށް ޓެގްކުރައްވައި ޢަބްދުއްރަޙީމް ކުރެއްވި ޓްވީޓުގައި ސުވާލުތައް އަމާޒުކުރައްވައި ފާޑުވިދާޅުވެފައިވާއިރު އޭނާ ކުރެއްވި އެހެން ޓްވީޓެއްގައި ވަނީ ކިތަންމެ އިންޒާރެއް ދިނަސް ދިވެހިން ދިވެހިންގެ ޤައުމުގެ ޙައްޤުގައި ތެދުވާނެކަމަށާއި ދީން ދިފާޢުކޮށް ޤައުމުގެ މިނިވަންކަން ދަމަހައްޓައި ރައްޔިތުންގެ ޙައްޤުތައް ކަށަވަރުކުރާނެކަމަށް ވިދޅުވެފައެވެ. އަދި ޤައުމު އަޅުވެތިކުރާތަން ބަލަން ދިވެހިން ނުތިބޭނެކަމަށް ވެސް އޭނާ ވަނީ ވިދާޅުވެފައެވެ.