ތެލުގެ ހިދުމަތްދޭ އެއްވެސް ތަނަކުން މާލެ ސިޓީގައި މީހުން ދިރިއުޅޭ ސަރަހައްދަށް ތެޔޮ ސަޕްލައި ކޮށްދިނުމަކީ މަނާކަމެއް ކަމަށް ސިޓީ ކައުންސިލުން ބުނެފިއެވެ.
މާލޭ ސިޓީ ކައުންސިލުން ބުނީ މާލޭ ސިޓީގައި ހިނގާ އަލިފާނުގެ ހާދިސާތައް މަދުކޮށް އެފަދަ ހާދިސާތަކުން މީހުން ސަލާމަތް ކުރުމުގެ ގޮތުން، ޑިފެންސް މިނިސްޓްރީން 12 އޮގަސްޓް 2012 ވަނަ އަހަރު ގެޒެޓްކޮށްފައިވާ ތެލުގެ ބާވަތްތައް ގެންގުޅެ، ބޭނުންކޮށް އަދި ގުދަންކުރުމާ ބެހޭ ގަވައިދުގެ ދަށުން ތެލުގެ ހިދުމަތްދޭ އެއްވެސް ތަނަކުން މީހުން ދިރިއުޅޭ ސަރަހައްދަށް ތެޔޮ ސަޕްލައި ކޮށްދިނުމަކީ މަނާ ކަމެއް ކަމަށެވެ.
“ހަވާލާދީފައިވާ ގަވާއިދާ ހިލާފަށް މީހުން ދިރިއުޅޭ ސަރަޙައްދުގައި ތެޔޮ ރައްކާކޮށް ގެންގުޅުމަކީވެސް މަނާ ކަމެއް ކަމަށް މާލޭ ސިޓީ ކައުންސިލްގެ 03 ވަނަ ދައުރުގެ 105 ވަނަ ރަސްމީ އާއްމު ޖަލްސާއިން ވަނީ ނިންމަވާފައި،” މާލޭ ސިޓީ ކައުންސިލުން ބުންޏެވެ.
މާލޭ ސިޓީ ކައުންސިލުން ބުނީ މި އެންގުމާ ހިލާފުވާ ފަރާތްތަކަށް ގަވައިދުން ފިޔަވަޅު އަޅާނެ ކަމަށެވެ.
މާލެ ސިޓީގައި މީހުން ދިރިއުޅޭ ސަރަހައްދަށް ތެޔޮ ސަޕްލައި ކޮށްދިނުން މަނާކޮށްފައި ވާއިރު، މިދިޔަ މަހުގެ ތެރޭގައި މާލޭގައި ވަނީ ނުރައްކާތެރި އަލިފާނުގެ ހާދިސާއެއް ހިނގައިފައެވެ. އަދި މާލޭގައި މީހުން ދިރިއުޅޭ ސަރަހައްދުގައި ތެލާއި ކެމިކަލް ގުދަންކޮށްފައި ހުންނަ ކަމަށާއި، އެފަދަ ތަންތަނާމެދު އެކަށީގެންވާ ފިޔަވަޅު ނޭޅޭކަމުގެ ޝަކުވާ އާނުންމުން އަންނަނީ ކުރަމުންނެވެ.