ކޮވިޑް-19 ގެ ހާލަތު ރާއްޖޭގައި އޮއްވައި، ރައްޔިތުން ގުނބޯ ހައްދައި ސަރުކާރާ ތޮޅެން ނޫޅުމަށް ޖުމްހޫރީ ޕާޓީގެ ނައިބު ރައީސް އަހުމަދު ސައުދު ގޮވާލައްވައިފި އެވެ.
ސައުދު މިއަދު ކުރެއްވި ޓްވީޓެއްގައި ވިދާޅުވީ އެ ޕާޓީ ސާބިތުވެ އޮތީ ރައީސް ސޯލިހާއެކު ކަމަށެވެ. އަދި ބަލިމަޑުކަމުގެ މި ހާލަތުގައި ސަރުކާރާ ތޮޅެއް ނޫޅުމަށް ސައުދު ގޮވާލެއްވިއެވެ.
“ޖުމްހޫރީ ޕާޓީ އޮތީ ސާބިތުކަމާއެކު ރައީސް އިބްރާހިމް މުހައްމަދު ސޯލިހާއެކު. ކޮވިޑް-19 ގެ މި ހާލަތުގައި ރައްޔިތުން ގުނބޯ ހައްދައިގެން ސަރުކާރާ ތޮޅެއް ނޫޅޭތި،” އިދިކޮޅަށް އިޝާރާތް ކުރައްވާ ސައުދު ވިދާޅުވިއެވެ.
ސައުދު ވިދާޅުވި ގޮތުގައި ގައުމު ދެކެ ލޯބިވާ އެއްވެސް ބަޔަކު މި ހާލަތުގައި ސިޔާސީ މަންފާއެއް ހާސިލް ކުރުމަށް ގައުމު ހަލަބޮލި ކުރަން ނޫޅޭނެ ކަމަށެވެ.
Jumhooree party othee saabithu kamaaeku Raees @ibusolih Aa ekuga. #Covid-19 ge mihaalathuga, rayyithun gunbo hadhdhaigen sarukaaraa tholhen noolheythi. Gaumu dheke loabivaa ehves bayaku mihaalathuga, Siyaasee manfaa haasilu kurumah gaumu halaboli kuran noolheyne….!!!
— Ahmed Saud (@ammadaysaud) September 3, 2020
ސައުދު އެގޮތަށް ވިދާޅުވި އިރު، އިދިކޮޅު ފަރާތްތަކުން ދާދި ފަހުން ވަނީ މާލޭގައި ސައިކަލް ބުރެއް ބާއްވައިފަ އެވެ. އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިނިވަން ކުރުމަށް ގޮވާލައި، ކަނޑުމަތީގައި އިދިކޮޅު ފަރާތްތަކުން މުޒާހަރާއެއް ވެސް ކުރި އެވެ.
advertisment