ކޮވިޑް-19 އާ ގުޅިގެން އިއުލާނުކޮށްފައި ކާފިއު އާ ހިލާފުވެގެން ދެ ހަފްތާ ތެރޭ 550 މީހުން ޖޫރިމަނާކޮށްފައިވާ ކަމަށް ފުލުހުން ބުނެފިއެވެ.
މާލެ ސަރަހައްދުގައި ކޮވިޑް ފެތުރުން ކޮންޓްރޯލު ކުރުމަށް އަޅާފައިވާ ފިޔަވަޅެއްގެ ގޮތުން ރޭގަނޑު 10 އިން ފަތިހު ފަހަކަށް ބޭރަށް ނިކުތުން ވަނީ މަނާކޮށްފައެވެ. އަދި ރޭގަނޑު 8 އިން ފަތިހު 5 އަށް މާލެ ސަރަހައްދުގައި ވެހިކަލް ދުއްވުން ވެސް ވަނީ މަނާކޮށްފައެވެ.
ފުލުހުން ބުނީ މިދިޔަ މަހުގެ 22 އިން މި މަހުގެ ހަތަރުވަނަ ދުވަހުގެ ނިޔަލަށް ކާފިއު އާއި ހިލާފުވެގެން 1143 މީހަކަށް ނަސޭހަތްދީ 550 މީހުން ޖޫރިމަނާކޮށްފައިވާ ކަމަށެވެ.
ރޭގަނޑު 10 އިން ފަތިހު ފަހަކަށް ބޭރުގައި އުޅުން މަނާކޮށް މިވަގުތުތަކުގައި ބޭރުގައި އުޅޭ މީހުންނަށް ނަސޭހަތްދީ، ތަކުރާރު ކުރާނަމަ 1،000 ރުފިޔާ އިން ޖޫރިމަނާ ކުރެ އެވެ. މީގެ އިތުރުން މާސްކް ނާޅައި ބޭރުގައި އުޅުން ވެސް ވަނީ މަނާކޮށްފައެވެ. މާސްކު ނާޅައި އުޅޭނަމަ ފުރަތަމަ ފަހަރު ނަސޭހަތްދީ، އެކަން ތަކުރާރު ކުރާނަމަ 1،000 ރުފިޔާ އިން ޖޫރިމަނާ ކުރެ އެވެ.
advertisment