އައްޑޫސިޓީގައި މި މަހުގެ އެއްވަނަ ދުވަހުގެ ރޭ ހިންގި މާރާމާރީއާއި ގުޅިގެން ހަތަރު މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
މިނިސްޓަރ އޮފް ހޯމްލޭންންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން އެކްސްގައި ކުރެއްވި ޕޯސްޓެއްގައި ވިދާޅުވީ މި މަހުގެ އެއްވަނަ ދުވަހުގެ ރޭ އައްޑޫގައި ހިންގި މާރާމާރީގައި އަމަލީގޮތުން ބައިވެރިވި ކަމަށް ތުހުމަތު ކުރެވޭ ހަތަރު މީހަރު ރޭގެ ވަގުތެއްގައި ފުލުހުންގެ ބެލުމުގެ ދަށަށްގެންގޮސްފައިވާ ކަމަށެވެ.
މި މާރާމާރީއާއި ގުޅިގެން މިނިސްޓަރު ވިދާޅުވީ އައްޑޫގެ އަމާންކަން ދެމެހެއްޓުމަށް ފުލުހުން ހާއްސަ ފިޔަވަޅުތަކެއް އަޅާފައިވާކަމަށެވެ.
ޑިސެމްބަރު 1 ވަނަ ދުވަހުގެރޭ އައްޑޫ ސިޓީގައި ހިނގާދިޔަ މާރާމާރީގައި އަމަލީގޮތުން ބައިވެރިވިކަމަށް ތުހުމަތު ކުރެވޭ 4 ފަރާތެއް ވަނީ ރޭގެ ދަންވަރު ދިވެހި ފުލުހުންގެ ބެލުމުގެ ދަށަށް ގެނެވިފައި. އަދި އަމަންއަމާންކަން ދެމެހެއްޓުމަށްޓަކައި ފުލުހުން ވަނީ ޚާއްސަ ފިޔަވަޅުތަކެއް އަޅާފައި. https://t.co/RK7dzoOVww
— Minister of Homeland Security & Technology (@min_mohst) December 3, 2023
އައްޑޫގައި ހުކުރު ދުވަހުގެ ރޭ ހިނގިމާރާމާރީގައި 30 އަހަރުގެ ދިވެހި ފިރިހެނަކަށް އަނިޔާވެ އައްޑޫ އިކުއެޓޯރިއަލް ހޮސްޕިޓަލުގައި އަންނަނީ ފަރުވާދެމުންނެވެ. އެ ޒުވާނާގެ ގިނަ ތަންތަނަށް ތޫނު އެއްޗަކުން ހަމަލާދިނުމުގެ ސަބަބުން އޭނާގެ ހާލު ސީރިއަސް ކަމަށް ހޮސްޕިޓަލާއި ހަވާލާދީ ފުލުހުން މީގެ ކުރިން ވަނީ ވިދާޅުވެފައެވެ.
މި ފަހުން މާލޭގައި ހިނގާދިޔަ މާރާމާރީއާއި އައްޑޫގައި ހިނގާދިޔަ މާރާމާރިއާއި ގުޅިގެން މާލެއާއި އައްޑޫސިޓީގެ ސަލާމަތާއި ރައްކާތެރިކަން ބަލެހެއްޓުމުގެ ގޮތުން ޙާއްސަ މަސައްކަތްތަކެއް ފުލުހުން ވަނީ ފަށާފައެވެ.
އެގޮތުން އައްޑޫސިޓީގެ ސަލާމަތާއި ރައްކާތެރިކަން ދެމެހެއްޓުމަށްޓަކައި މާލެއިން އިތުރު ޓީމްތަކެއް އައްޑޫސިޓިއަށް ފޮނުމުގެ މަސައްކަތް ކުރަމުން އަންނަ ކަމަށާއި އެ މާރާމާތިއާއި ގުޅުންހުރި ފަރާތްތައް ހޯދައި، ޤާނޫނީ ފިޔަވަޅު އެޅުމަށްޓަކައި ކުރަން ޖެހޭ މަސައްކަތް ކުރަމުން އަންނަ ކަމަށް ފުލުހުން ވަނީ ވިދާޅުވެފައެވެ.
މީގެއިތުރުން މިމައްސަލަ އާއި ގުޅިގެން ހައްޔަރުކޮށްފައިވަނީ އުމުރުން 18 އަހަރާއި 19 އަހަރާއި 20 އަހަރާއި 23 އަހަރުގެ ދިވެހި ފިރިހެނުންނެވެ.
advertisment