ރައީސް އިބްރާހިމް މުޙައްމަދު ސޯލިޙްގެ ސަރުކާރުން ރާއްޖޭއާއި ޗައިނާ ދެމެދު އޮތް ‘ވަން ޗައިނާ ޕޮލިސީ’ ގުޅުން ހިފަހައްޓަވާނެ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ޗައިނާ އުފެދުނުތާ 71 އަހަރު ފުރޭ މުނާސަބަތުގައި ބޭއްވި ވީޑިއޯ ރިސެޕްޝަންގައި ވާހަކަ ދައްކަވަމުން މިނިސްޓަރު ޝާހިދު ވިދާޅުވީ ކޮވިޑް-19އާ ގުޅިގެން ރާއްޖޭގެ އިޤްތިޞާދަށް ކުރިމަތިވެފައިވާ ހީނަރުކަމުން އަރައުގަތުމަށް ރާއްޖެއާއި ޗައިނާއާ ދެމެދު ގުޅުން ބަދަހިކުރުން މުހިންމު ކަމަށެވެ.
މިނިސްޓަރު ވިދާޅުވީ ރާއްޖޭގެ އިގްތިސާދު ކުރިއެރުވުމަށް ކުރަމުންދާ މަސައްކަތުގެ ތެރެއިން އެންމެ މުހިންމު މަސައްކަތަކީ ރާއްޖެއަށް އަންނަ ފަތުރުވެރިން އިތުރު ކުރުން ކަމަށެވެ.
އެގޮތުން ރާއްޖެއާއި ޗައިނާއާ ދެމެދު މިހާރު މެދުކެނޑިފައި އޮތް ދަތުރުތަކާއި ވިޔަފާރީގެ ގުޅުން ވީހާވެސް އަވަހަށް އަލުން ފަށައިގަންނަންޖެހޭ ކަމަށް މިނިސްޓަރު ވިދާޅުވިއެވެ.
ރާއްޖެއާއި ޗައިނާއާ ދެމެދު ހާރިޖީ ގުޅުން ގާއިމުކުރިތާ 48 އަހަރު ފުރޭއިރު، ދެގައުމުގެ ދެމެދުގައި އޮތް ގުޅުމަކީ ތާރީހީ ގޮތުން ވަރުގަދަ އަދި ހަމަހަމަކަމުގެ މައްޗަށް ބިނާވެގެންވާ ގުޅުމެއްކަން މިނިސްޓަރުގެ ވާހަކަފުޅުގައި ވަނީ ފާހަގަ ކުރައްވާފައެވެ.
Pleased to participate in the virtual reception held by @AmbassadorZhang to celebrate the 71st Anniversary of the founding of the PR of #China. Our bilateral relationship is anchored in shared historic bonds, sovereign equality, & the Maldives’ commitment to the One-China Policy pic.twitter.com/vMLmuF0vKH
— Abdulla Shahid (@abdulla_shahid) September 23, 2020
މިނިސްޓަރުގެ ވީޑިއޯ މެސެޖެގައި މިހާރު ކުރިމަތިވެފައިވާ ކޮވިޑް-19ގެ ހާލަތުގައި ޗައިނާ ސަރުކާރުންނާއި އެގައުމުގެ ކުންފުނިތަކުން ވެދީފައިވާ އެހީތަކަށް މިނިސްޓަރު ވަނީ ޝުކުރު އަދާކުރައްވާފަ އެވެ.
މިނިސްޓަރު ވިދާޅުވީ ކޮވިޑަށް ޚާއްސަކޮށްގެން ޗައިނާގެ ކުންފުނިތަކުން އުފައްދަމުންދާ ވެކްސިންގެ ފައިދާ ރާއްޖެއަށް ކުރާނެ ކަމަށް އުންމީދު ކުރައްވާ ކަމަށެވެ.
ޕީޕަލްސް ރިޕަބްލިކް އޮފް ޗައިނާ އުފެދުނީ 1949 ވަނަ އަހަރުގެ އޮކްޓޯބަރ 1 ގައެވެ.