“ތައުބާ” ވުމުން އިޔާޒްގެ ތައުރީފް އަދީބަށް!

އެމްއެމްޕީއާރްސީގެ ހިޔާނާތުގެ މައްސަލައިގައި ކުރީގެ ނައިބް ރައީސް އަހުމަދު އަދީބަށް ކުރެވިފައިވާ ކުށްތަކަށް ތައުބާވެ، ރައްޔިތުންގެ ކިބައިން މައާފަށް އެދުމުން މަޝްހޫރު ދީނީ އިލްމުވެެރިޔާ ޑރ. މުހައްމަދު އިޔާޒު ތައުރީފު ކުރައްވައިފިއެވެ.

އަދީބު އިއްޔެ ވަނީ ކްރިމިނަލް ކޯޓުގައި ކުރިއަށްދިޔަ އޭނާގެ މައްޗަށް އުފުލާފައިވާ ހަތް ދައުވާގެ ޝަރީއަތުގެ އިބްތިދާއީ އަޑުއެހުމުގައި އެމްއެމްޕީއާރްސީގެ ހިޔާނާތުގެ މައްސަލައިގައި ކުރެވިފައިވާ ކުށްތަކަށް ތައުބާވެފައިވާ ކަމަށާއި އަދި ރައްޔިތުންގެ ކިބައިން މައާފަށް އެދިފައެވެ.

މިކަމާ ގުޅިގެން އިޔާޒު ކުރެއްވި ޓްވީޓެއްގައި ވަނީ މާފު ކުރުމާ ގުޅޭ ގޮތުން ކީރިތި ރަސޫލާގެ ހަދީތެއް ހިއްސާ ކުރައްވާފައެވެ.

“ކޮންމެ އިންސާނަކީ ވެސް ކުށް ކުރެވޭނެ މީހެކެވެ. އޭގެ ތެރެއިން އެންމެ ހެޔޮ މީހަކީ ކުށް ކުރެވޭ ހިނދު އެކަމަށް ތައުބާވާ މީހާއެވެ- ހަދީޘް” އިޔާޒުގެ ޓްވީޓުގައި ވެއެވެ.

"Konme insaanaky ves kuh kureveyne meehekeve. Eyge therein enme heyo meehaky kuh kurevey hindhu ekamah thaubaa vaa meeha eve." Hadheeth.

— Dr Mohamed Iyaz (@dr_iyaz) September 30, 2020

ކޯޓުގައި ވާހަކަދައްކަވަމުން އަދީބު ވިދާޅުވީ އެމްއެމްޕީއާރްސީގެ ހިޔާނާތުގައި ކަންކަން ހިނގާފައިވާ ގޮތް ކިޔައިދިނުމަކީ ގައުމީ ވާޖިބެއްގެ ގޮތުގައި ދެކޭ ކަމަށާއި ދައުލަތަށް މިކަމުގައި އެއްބާރުލުން ދެމުން އަންނަނީ ވެސް އެ ސަބަބާއި ހުރެ ކަމަށެވެ.

އަދި މި މައްސަލައިގައި ޖަލުގައި ގިނަ ދުވަސްތަކެއް ހޭދަކުރަންޖެހި ސިއްހީ އެކި މައްސަލަތަކަކާއި ވެސް ކުރިމަތިލާން ޖެހިފައިވާ ކަމަށާއި ޖަލުގައި ހޭދަކުރެއްވި ދުވަސްތަކުގައި ކުރެވުނު ކުށްތަކާއި މެދު ހިތާމަކޮށް، ތައުބާ ވެފައިވާ ކަމަށްވެސް އަދީބު ވިދާޅުވިއެވެ. އަދި ދައުލަތާއި ރައްޔިތުންގެ ކިބައިން މިކަމުގައި މައާފަށް އެދޭ ކަމަށްވެސް އަދީބު ވިދާޅުވިއެވެ.

މިއީ އެމްއެމްޕީއާރްސީގެ މައްސަލައިގައި ރައްޔިތުންގެ ކިބައިން އަދީބު މައާފަށް އެދުނު ފުރަތަމަ ފަހަރެވެ.