އައްޑޫ ޕޮލިސް އެކަޑަމީން ޕޮޒިޓިވްވި މީހުން ކަރަންޓީނުގެ އަމުރާ ހިލާފުވެފައިވާ ކަމަށް ހެލްތު އިމަޖެންސީ އޮޕަރޭޝަންސް ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.
ޑރ. ނަޒްލާ ވިދާޅުވީ ކަރަންޓީނުގައި ތިބި މީހުންގެ ތެރެއިން އިތުރު މީހަކާއި އެކެޑަމީގައި މަސައްކަތް ކުރާ މީހުންގެ ތެރެއިން އިތުރު އެކަކު ވެސް ޕޮޒިޓިވްވެފައިވާ ކަމަށެވެ. އެގޮތުން އެމީހާއަކީ ކަަރަންޓީނުގައި ތިބި މީހުންގެ ސައިޓަަަށް ގޮސްފައިވާ މީހެެއްކަން ވެސް ފާހަގަކުރައްވަ އެވެ.
“ކަރަންޓީންގެ އުސޫލުތަކާވެސް ހިލާފުވެފައިވާކަމަށް މި ފާހަގަކުރެނީ. އެއީ ކަރަންޓީންގައި ތިބި މީހުން ކައިރިއަށް އެހެން މީހަކު އެމީހުންގެ ވޯކް ސައިޓުންވެސް އައިސްފައިވާ ކަމަށް. އަޅުގަނޑުމެން މިވާހަކަ ވާނީ ޕޮލިހަށްވެސް ރެފާކޮށްފައި،” ޑރ. ނަޒްލާ ވިދާޅުވިއެވެ.
މި ކޭސްތަކާ ގުޅިގެން 377 ސާމްޕަލްވަނީ ނަގާފައެވެ. މީގެތެރެއިން 56 މީހުން ޕޮޒިޓިވްވެފައިވާއިރު، 85 ސާމްޕަލް ވަނީ ނެގެޓިވް ވެފައެވެ. އަދި އިތުރު 74 ސާމްޕަލްގެ ނަތީޖާ ނުލިބޭކަމަށް ޑރ. ނަޒްލާ ވިދާޅުވިއެވެ.