ހޯނޑެއްދޫ އިން ކޮވިޑް-19 އަށް ޕޮޒިޓިވްވި އެންމެން ބަލިން ރަނގަޅުވެއްޖެއެވެ.
އެރަށުން ރެންޑަމްކޮށް ނެގި ސާމްޕަލްތަކެއް މިދިޔަ މަހުގެ ހަތަރުވަނަ ދުވަހު ޕޮޒިޓިވްވުމާ ގުޅިގެން އެ ރަށް ވަނީ މޮނީޓަރިންގެ ހާލަތަށް ގެނެސްފައެވެ.
ހޯނޑެއްދޫން ކޮވިޑަށް ބަޔަކު ފުރަތަަމަ ޕޮޒިޓިވް ވީ މިދިޔަ މަހުގެ ދެވަނަ ދުވަހު އެވެ. އެއީ މާލެއިން އެރަށަށް ގޮސް އެއް ގެއެއްގައި ހޯމް ކަރަންޓީންގައި ތިބި އެއް އާއިލާއެއްގެ ހަތަރު މެންބަރުންނެވެ.
ހޯނޑެއްދޫ ސިއްހީ މަރުކަޒުން އާންމުކޮށްފައިވާ ތަފާސް ހިސާބުތަކަށް ބަލާއިރު އެ ރަށުން ބައްޔަށް ޕޮޒިޓިވްވި 45 މީހުން ވެސް މިހާރު ވަނީ ބަލިން ރަނގަޅުވެފައެވެ. އެހެންނަމަވެސް އެ ރަށުގެ ދެ ގެއެއް މިވަގުތު ހުރީ މޮނީޓަރިންގެ ހާލަތުގައެވެ.