ހޯރަފުށި އެއާޕޯޓުގެ މަސައްކަތް 11 ނޮވެމްބަރަށް ނިންމާލެވޭނެ: އެމްޓީސީ

ހއ. ހޯރަފުށީގައި ތަރައްގީ ކުރާ އެއާޕޯޓުގެ މަސައްކަތް އަންނަ ނޮވެމްބަރު މަހަށް ނިންމައިލެވޭނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.

ހޯރަފުށީ އެއާޕޯޓުގެ މަސައްކަތް ކުރިޔަށް ދާ ގޮތް، ކުންފުނީގެ ސީއީއޯ އާދަމް އާޒިމް ވަނީ ބައްލަވާލައްވާފައެވެ. އަދި އެ މަޝްރޫއާއި ގުޅޭ މައުލޫމާތުތައް މީޑިއާތަކާއި ހިއްސާ ކުރަމުން އެމްޓީސީސީއިން ބުނެފައިވަނީ މަސައްކަތް ނޮވެމްބަރު މަހުގެ 11 އަށް ނިންމާލެވޭނެ ކަމަށެވެ. މަސައްކަތަށް އެއްވެސް މަޑުޖެހުމެއް ނެތި ކުރިޔަށް ދާ ކަމަށާއި، މިހާރު ކުރަމުން އަންނަނީ އެއާޕޯޓުގެ ޕެސެންޖާ ޓާމިނަލާއި ފަޔާ ބިލްޑިންގެ މަސައްކަތް ކަމަށް އެ ކުންފުނިން ވަނ ބުނެފައެވެ.

އެމްޓީސީސީއިން ބުނެފައިވާ ގޮތުން ޕެސެންޖާ ޓާމިނަލާއި ފަޔާ ބިލްޑިންގެ އަމަލީ މަސައްކަތް ފަށާފައިވަނީ މިދިޔަ މަހުގެ 19 ވަނަ ދުވަހުއެވެ.

ޖުމްލަ 13.8 މިލިއަން ރުފިޔާއަށް މި މަސައްކަތް އެމްޓީސީސީއާ ހަވާލުކޮށްފައިވަނީ މިދިޔަ އޮގަސްޓް މަހުގެ 27 ވަނަ ދުވަހުއެވެ. އެއީ މަޝްރޫއުގެ އެއްބަސްވުމުގައި ސޮއިކުރާ ތާރީހުން ފެށިގެން 80 ދުވަސް ތެރޭގައި މަސައްކަތް ނިންމައި ޓްރާންސްޕޯޓު މިނިސްޓްރީއާ ހަވާލުކުރާ ގޮތަށެވެ.

CEO @adamazim inspects the progress of the ongoing works at Ha. Hoarafushi Airport. We are tirelessly working to complete the project by 11 November 2020. pic.twitter.com/zGrt3ImHAc

— MTCC Plc (@MTCCPlc) October 16, 2020

ހޯރަފުށި އެއާޕޯޓްގެ ޕަސެންޖާ ޓާމިނަލާއި ފަޔާ ބިލްޑިންގެ މަސައްކަތް އެމްޓީސީސީން ކުރަމުން އަންނަ އިރު އެ އެއާޕޯޓު ހެދުމުގެ މަޝްރޫއު ވެސް ކުރަމުން އަންނަނީ އެމްޓީސީސީއިންނެވެ.

ހޯރަފުށި އެއާޕޯޓު ނިނގެންދާއިރު 1200 މީޓަރުގެ ރަންވޭއަކާއި، 8،635 އަކަމީޓަރުގެ އޭޕްރަންއަކާއި ޓެކްސީވޭ އަކާއި، ސާވިސް ޜޯޑުގެ އިތުރަށް 9،473 އަކަމީޓަރުގެ ޕާކިންގ އޭރިޔާއެއްގެ އިތުރަށް 720 މީޓަރުގެ އެއާޕޯޓު ސެކިޔުރިޓީއާއި ބީޗް ފެންސް އޭރިޔާއެއް ތަރައްގީކުރެވޭނެއެވެ.

އެއާޕޯޓި ހެދުމަށް ބިން ހިއްކުމުގެ މަސައްކަތްކޮށް ނިންމާލާފައިވަނީ މިދިޔަ އަހަރުގެ އޮގަސްޓް މަހުގެ ތެރޭގައެވެ. އަދި ރިވެޓްމަންޓް ޖެހުމުގެ މަސައްކަތް މިއަހަރުގެ މާޗް މަހުގެ ތެރޭގައި ވަނީ ނިންމާލާފައެވެ.

ޖުމްލަ 842،200 ކިއުބިކް މީޓަރުގެ ބިން ހިއްކައިގެން ތަރައްގީކުރާ ހޯރަފުށީ އެއާޕޯޓުގައި 1،200 މީޓަރުގެ ރަންވޭއަކާއި 8،635 އަކަމީޓަރުގެ އޭޕްރަންއަކާއި ޓެކްސީވޭއެއް އޮންނާނެއެވެ.