މިޔުޒިކް އަޑުއަހައި މަޖާކޮށްލުމަށް މަރުކަޒެެއް ހެދުމަކީ ކަނޑައެޅިގެން ގާނޫނާ ހިލާފުކަމެއް ކަމަށް ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ(މޮސްޓާ) ވިދާޅުވެއްޖެއެވެ.
މޮސްޓާ މިހެން ވިދާޅުވީ މިޔުޒިކް އަޑުއަހާލައި، ހާސްކަމެއް ނެތި މަޖާ ކޮށްލުމަށް މަރުކަޒެއް ގާއިމް ކުރުމަށް ގޮވާލައި ރައްޔިތުންގެ މަޖިލީހަށް ގަރާރެއް ހުށަހަޅުމާ ގުޅިގެންނެވެ. އެ ގަރާރު ހުށަހެޅުއްވީ ހެންވޭރު ހުޅަނގު ދާއިރާގެ އެމްޑީޕީ މެމްބަރު ހަސަން ލަތީފް އެވެ.
މިކަމާ ގުޅިގެން މޮސްޓާ ކުރެއްވި ޓްވީޓެއްގައި ވިދާޅުވީ އެއީ ކަނޑައެޅިގެން ގާނޫނާ ހިލާފުކަމެއް ކަމަށާއި ރައްޔިތުންގެ މަޖިލީހުގައި އެކަހަލަ ކަމަކަށް ބަހުސް ނުކުރެވޭނެ ކަމަށެވެ.
“މިއީ ނާސިގެއެއް ހަދަން ގޮވާލުން. ލަވައާއި މިއުޒިކަކީ ހަރާމް ކަމެއް ކަމަށް 25 އަށް ވުރެ ގިނަ ދިވެހި އިލްމުވެރިން ވަނީ ފަތުވާ ނެރެފައި.” މޮސްޓާ ވިދާޅުވިއެވެ.
Mee kandaelhigen gaanoonu asaasee aa hilaafu kameh… @mvpeoplesmajlis ga mikahala kamakah bahus nukurevayne. Mee Naasige eh hadhan govaalun… Lava aa music akee haraan kameh kamah 25 ah vure Gina dhivehi ilumuverin vanee fathuvaa nerefa… pic.twitter.com/fYQXQVEicu
— Mohamed Nasheed Abdulla (@MNA_MosTaaA) October 28, 2020
ހަސަން ލަތީފް ހުށަހެޅުއްވި އެ ގަރާރުގައި ބުނެފައި ވަނީ މާލެ އަށް ދިމާވެފައިވާ މައްސަލަތަކުގެ ހައްލު ހޯދައި ދިނުމަށް ސަރުކާރުން މަސައްކަތް ކުރަމުންދާއިރު ވެސް ހާސްކަމުގެ ތެރޭގައި މާލޭގައި އުޅެން ޖެހިފައިވާ ޒުވާނުންނަށް އެ ހާސްކަމުން މިންޖުކުރެވޭނެ މަރުކަޒެއް ބޭނުންވެފައިވާ ކަމަށެވެ.
އެގޮތުން ޒުވާނުންނާއި ރައްޓެހިންނާއި އެކުވެރިންނާއެކު ހީނ، ސަމާސާކޮށް، މަޖާކޮށްލެވޭ ފަދަ މާހައުލެއް މިޔުޒިކް އަޑުއަހާލައި، ވަގުތު ހޭދަކޮށްލެވޭނެ މަރުކަޒަކަށް މިއަދު މާލޭގައި އުޅޭ ޒުވާނުން އިންތިހާ އަށް ބޭނުންވެފައިވާ ކަމަށެވެ.
ތަފާތު ވައްތަރުގެ މިޔުޒިކާއި ލަވަ އަޑުއަހާލަން ޒުވާނުން އެއްވެ އުޅެވޭނެ ތަނެއްގެ މުހިންމުކަން އިތުރުވެފައިވާ ކަމަށް ވިދާޅުވެ ހަސަން ލަތީފްގެ ގަރާރުގައި ޒުވާނުންގެ ތެރޭގައި އާދަޔާ ހިލާފު ފަންނުތަކާއި ހުނަރުތައް ހުންނަ ޒުވާނުން އުޅޭ ކަމަށް ބުނެފައިވެއެވެ.