މާލޭގައި ޓެކްސީ ކުރާ ހަމައެކަނި އަންހެން ޑްރައިވަރު އާމިނަތު ވަހީދާ (ޑްރައިވަރު އައިންތު) އަށް ދިމާވަމުންދާ ދަތިތަކާ ގޯނާތަކާ ބެހޭގޮތުން މާލެ ސިޓީ ކައުންސިލުގެ މޭޔަރު ޝިފާ މުހައްމަދާ މަޝްވަރާކޮށްފިއެވެ.
މިކަމާ ގުޅިގެން މާލެ ސިޓީ ކައުންސިލުން ބުނީ، މޭޔަރު ޝިފާ، އައިންތުއާ ބައްދަލުކޮށް އޭނާއަށް ދިމާވާ ދަތިތަކާއި ގޯނާތަކާއި ބެހޭ ގޮތައް ޝިފާއާ ހިއްސާކޮށްފައިވާ ކަމަށެވެ.
އަދި އެ ގޯނާތަށް ކުރާ ފަރާތްތަކަށް ފިޔަވަޅު އެޅުމަށް ފުލުހުންގެ ކިބައިން މޭޔަރު ޝިފާ އެދިފައިވާނެ ކަމަށް އެ ކައުންސިލުން ބުނެއެވެ.
އާމިނަތު ވަހީދާ އަކީ ރާއްޖޭގައި ހުރި ހަމަ އެކަނި އަންހެން ޑްރައިވަރ، މާލޭ ސިޓީގައި ޓެކްސީކޮށްގެން ހަލާލް މަސައްކަތުން ދިރިއުޅުމެއް ބިނާކޮށްގެން ދިރިއުޅެމުންދާ ފިސާރި ކަނބަލެއް،1/2 pic.twitter.com/ItX6MyNCzu
— Male' City Council (@MaleCitymv) October 30, 2020
މިދިޔަ ހަފްތާ ތެރޭގައި އައިންތު ގެ ކާރަށް އަނެއްކާވެސް ބަޔަކު ވަނީ ގެއްލުންތަކެއް ދީފައެވެ.
ޓެކްސީއަށް ގެއްލުންތަކެއް ދީފައިވާތީ އެކަމަށް ކަންބޮޑުވުންފާޅުކޮށް އައިންތު ފޭސްބުކްގައިކޮށްފައިވާ ޕޯސްޓެއްގައި ބުނެފައިވަނީ ކާރަށް ގެއްލުންތައް ދީފައިވަނީ ޑްރަގް ކޯޓު ކުރިމަތީ ޕާކުކޮށްފައި އޮއްވާ ކަމަށެވެ. އަދި މިއީ ޓެކްސީ ކުރަން ފެށިފަހުން ބަޔަކު ކާރަށް ގެއްލުންދިން ފަސް ވަނަ ފަހަރުކަމަށް ވެސް އައިންތު ވަނީ ބުނެފައެވެ.
ކާރަށް ދޭ ގެއްލުންތައް ރަނގަޅުކުރުމަށް ބޮޑު ހަރަދުތަކެއް ދާއިރު، އައިންތު ވަނީ މިފަދަ އަމަލުތަކުގެ ސަބަބުން ކާންބޯން ކުރާ މަސައްކަތަށް ހުއްޓުމެއް އައިސްފައިވާ ކަމަށެވެ. އަދި މިކަން ހައްލުކޮށް ދިނުމަށް ފުލުހުންނާއި، އާއްމުންގެ އެހީތެރިކަން ވަރަށް ބޮޑަށް ބޭނުންވާ ކަމަށް އައިންތު ވަނީ ބުނެފައެވެ.