ރާއްޖޭގެ 30 ރިސޯޓެއްގައި ކޮވިޑް-19އަށް ޕޮޒިޓިވް ވެފައިވާ 207 މީހުން މިވަގުތު އެބަތިބި ކަމަށް ހެލްތް ޕްރޮޓެކްޝަން އެޖެންސީ(އެޗްޕީއޭ) އިން ބުނެފިއެވެ.
އެޗްޕީއޭ އިން ރޭ ނެރުނު ތަފާސްހިސާބުތައް ދައްކާގޮތުން އެ 207 މީހުންގެ ތެރޭގައި ހިމެނެނީ 52 ފަތުރުވެރިންނާއި 155 މުވައްޒަފުން ކަމަށެވެ. ނަމަވެސް އެއީ ކޮން ރިސޯޓުތަކެއްކަން ހާމަކޮށްފައެއް ނުވެއެވެ.
އެޗްޕީއޭގެ ތަފާސް ހިސާބުތައް ދައްކާ ގޮތުން ރާއްޖޭގެ 14 ރަށެއްގައި ކޮވިޑްގެ 17 އެކްޓިވް ކޭސް އެބައުޅެއެވެ.
ރާއްޖެއިން މިއަދު އިތުރު 32 މީހަކު ޕޮޒިޓިވް ވެފައިވާއިރު، އޭގެތެރޭގައި ހިމެނެނީ 17 ދިވެހިންނާއި 15 ބިދޭސީންނެވެ. މިއަދު ޕޮޒިޓިވްވި މީހުންނާއެކު ރާއްޖެއިން މި ބައްޔަށް ޕޮޒިޓިވްވި މީހުންގެ އަދަދު ވަނީ 12،578 އަށް އަރާފައެވެ.