ދިރާސާ ރިޕޯޓު: މާލޭގައި އުޅޭ 38،000 މީހުންނަށް ކޮވިޑް ޖެހި ވަނީ ރަނގަޅުވެފައި!

މާލޭގެ އާބާދީއަށް ބަލާއިރު 38،000 ވަރަކަށް މީހުންނަށް ކޮވިޑް-19 ޖެހި ރަނގަޅުވެފައިވާ ކަމަށް ބައްޔާއި ގުޅިގެން ހެދި ދިރާސާއިން ދައްކައިފިއެވެ.

ހެލްތް އިމަޖެންސީ އޮޕަރޭޝަންސް ސެންޓަރުން އާދީއްތަ ދުވަހު ކުރިޔަށް ގެންދިޔަ ނޫސްވެރިންގެ ބައްދަލުވުމުގައި، ދިވެހި ރާއްޖޭގެ ގައުމީ ޔުނިވާސިޓީގެ ޑިރެކްޓާރ އޮފް ރީސާޗް ޑރ. ރަހީމާ އަބްދުއްރަހްމާން ވިދާޅުވީ ސިރޯ ޕްރިވިލެންސްގެ ތެރެއިން ޓެސްޓް ކުރި މީހުންގެ ތެރެއިން އެންޓި ބޮޑީ ހުރިކަމަށް ދައްކަނީ 13.4 އިންސައްތަ މީހުންގެ ހަށިގަނޑުން ކަމަށެވެ. އެއީ މާލޭގެ އާބާދީގެ ނިސްބަތުން ބަލާނަމަ 38،000 މީހުންނެވެ.

ޑރ. ރަހީމާ ވަނީ ސާމްޕަލްތަކުގެ ތެރެއިން ބޮޑު އިންސައްތައެއް ކޮވިޑަށް ހުށަހެޅިފައި ނެތްކަން ފާހަގަ ކުރައްވާފައެވެ. އެހެން ކަމުން މިއީ ރައްކާތެރިވުމުގައި ހާއްސަ ފިޔަވަޅުތަކެއް އަޅަންޖެހޭ ކަމެއްގެ ގޮތުގައި އޭނާ ވިދާޅުވިއެވެ. ރާއްޖޭގައި ކޮވިޑު ޖެހިފައިވާ މީހުންގެ ތެރެއިން ބިދޭސީންގެ ތެރެއިން 36.4 އިންސައްތަ މީހުންގެ ގައިގައި އެންޓިބޮޑީ ހުރިކަމަށް ދައްކާފައި ވެއެވެ.

ޑރ. ރަހީމާ ވިދާޅުވީ މާލޭގައި ބިދޭސީންގެ ތެރެއިން ކޮންމެ ތިން މީހަކުން އެކަކު ކޮވިޑަށް ހުށަހެޅުނު ކަމަށެވެ. އަދި ދިވެހިންގެ ތެރެއިން ކޮންމެ އެގާރަ މީހެއްގެ ތެރެއިން އެކަކަށް ބަލި ޖެހުނު ކަމަށެވެ.

ކުރިން ބައްޔަށް ޕޮޒިޓިވްވިކަން އެނގިފައިވާ މީހުންގެ ތެރެއިން 57.98 އިންސައްތަ މީހުންގެ ގައިގައި އަދިވެސް އެންޓިބޮޑީ ހުރިކަމަށް ކަމަށް ދިރާސާއިން ދައްކައެވެ. އަދި ބަލި ޖެހުނުކަން ނޭނގި ރަނގަޅުވި މީހުންގެ ތެރެއިން އެންޓިބޮޑީ ހުރިކަމަށް ދައްކާފައިވަނީ 10 އިންސަައްތަ މީހުންގެ ގައިންނެވެ.

ކޮވިޑަށް ޕޮޒިޓިވްވާ މީހުންގެ ގައިގައި ހުންނަ އެންޓިބޮޑީސް ދުވަސް ވާވަރަކަށް ދަށް ވެއެވެ. ރާއްޖޭގައި ފުރަތަމަ މަހު އެންޓިބޮޑީސް11 އިންސައްތައިގައި ހުރެއެވެ. އަދި އޭގެ 06 މަސް ފަހުން، އެ އަދަދު 06 އިންސައްތައަށް ދަށް ވެއެވެ. އެކަމަށް އިޝާރާތްކޮށް ރަހީމާ ވިދާޅުވީ ބައެއް ގައުމުތަކުގައި އެންޓިބޮޑީ 06 މަހަށް ހުންނަ ކަމަށެވެ. އަދި ބައެއް މީހުންގެ އެންޓިބޮޑީ ހުންނަނީ 03 މަހަށެވެ