ކޮވިޑު-19 އިން ރައްކާތެރިވުމަށް ދޭ ވެކްސިން ފޯރުކޮށްދިނުމަށް އެޝިއަން ޑެވެލޮޕްމަންޓު ބޭންކް (އޭޑީބީ) އިން ރާއްޖެއަށް 10 މިލިއަން ޑޮލަރުގެ އެހީ ދީފި އެވެ.
އޭޑީބީން ރާއްޖެއަށް ވީ އެހީގެ އެއްބަސްވުމުގައި ރާއްޖޭގެ ފަރާތުން ސޮއި ކުރެއްވީ ފިނޭންސް މިނިސްޓަރު އިބްރާހިމް އަމީރެވެ.
މީޑިއާތަކަށް މައުލޫމާތު ދެމުން ފިނޭންސް މިނިސްޓްރީން ބުނީ، މިއީ ކޮވިޑުގެ ވެކްސިނާއި ބެހޭ އިދާރީ ހަރަދުތަކަށް އޭޑީބީން ވެދިން އެހީއެކެވެ.
ރާއްޖެ ކޮވިޑާއި ދެކޮޅަށް ކުރި މަސައްކަތްތަކަށް މީގެ ކުރިން ވެސް އޭޑީބީން ގިނަ އެހީތަކެއް ފޯރުކޮށް ދިނެވެ.
ކޮވިޑުން ދިފާއުވުމަށް ރާއްޖެއިން ކުރި ހޭދަ 4 ބިލިއަން ރުފިޔާއަށް އަރަ އެވެ.