ރައީސް މައުމޫނަކީ ފިތްކަނޑައިގެންދާވަރުގެ އަނިޔާވެރި ވެރިކަމެއް ކުރެއްވި ބޭފުޅެއް: ނަޝީދު

ކުރީގެ ރައީސް މައުމޫން އަބްދުލްގައްޔޫމަކީ ފިތްކަނޑައިގެންދާވަރުގެ އަނިޔާވެރި ވެރިކަމެއް ކުރެއްވި ބޭފުޅެއްކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

“އާސްކް ސްޕީކާ” ޕްރޮގްރާމްގައި އާއްމު ފަރާތަކުން ޖަލަށްލާފައިވާ ކުރީގެ ރައީސް އަބްދުﷲ ޔާމީން ގެއަށް ބަދަލުކުރުމާ ގުޅޭގޮތުން ކުރި ސުވާލެއްގެ ޖަވާބުގައި ނަޝީދު ވިދާޅުވީ އެމަނިކުފާނުގެ ވެރިކަމުގައި މައުމޫން ޖަލަށް ނުލެއްވީ މައުމޫން ކަމެއް ނުކުރައްވާތީ ނޫން ކަމަށާއި މައުމޫނަކީ 30 އަހަރުގެ ދިގު ހުދުމުހުތާރު އަދި ދިވެހިންގެ ފިތްކަނޑައިގެންދާހާ އަނިޔާވެރި ވެރިކަމެއް ކަމެއް ކުރެއްވި ބޭފުޅެއް ކަމަށެވެ.

“އަޅުގަނޑު އެކަން ބެލީ ތާރީހުގެ ފަށްފުށަށް ގެންދެވި، އަޅުގަނޑުމެންނަށް ހެޔޮ ގޮތުގައި ދިވެހިންނަށް ވެރިކަން ކުރަމުން ދެވޭނެ ގޮތެއް ހޯދުން” މައުމޫން ޖަލަށް ނުލެއްވި ސަބަބާއި ގުޅޭގޮތުން ނަޝީދު ވިދާޅުވިއެވެ.

ނަޝީދު ވިދާޅުވީ ކުރީގެ ރައީސުންނާއި މެދު އެގޮތަށް ކަންތައް ކުރުމަށް ރާއްޖޭގެ ހުރިހާ ރައްޔިތުން ނުރުހޭ ކަމަށެވެ. އަދި ރައީސް ޔާމީން ޖަލުގައި ހުރުމުން ކަންބޮޑުވެވަޑައިގަންނަވާ ކަމަށް ނަޝީދު ވިދާޅުވިއެވެ.

ރައީސް މައުމޫން ޖަލަށް ނުލެއްވި ކަމަށް ރައީސް ނަޝީދު ވިދާޅުވި އިރު، ރައީސް ނަޝީދުގެ ވެރިކަމުގައި ރައީސް މައުމޫނު ފުލުހަށް ހާޒިރުކޮށް ވަރަށް ބޮޑަށް ފުރައްސާރަކޮށްފައިވެއެވެ.