ހުޅުމާލޭގައި ހަދާ އެފޯޑަބަލް ރޭންޖްގެ 2000 ހައުސިން ޔުނިޓް ޢިމާރާތްކުރުމުގެ މަސައްކަތް އިންޑިޔާ ކުންފުންޏަކާއި ހަވާލު ކޮށްފިއެވެ.
މިި މަޝްރޫއު ހަވާލުކޮށްފައިވަނީ އިންޑިއާގެ ނޭޝަނަލް ބިލްޑިންގްސް ކޮންސްޓްރަކްޝަން ކޮމްޕެނީ (އެންބީސީސީ) އާ އެވެ. ފަހި ދިރިއުޅުން ކޯޕަރޭޝަން ލިމިޓެޑް (އެފްޑީސީ) އާ އެންބީސީއާ އެކު މަޝްރޫއުގައި ސޮއިކޮށްފައިވަނީ މި މަހުގެ ދެވަނަ ދުވަހުއެވެ.
މި މަޝްރޫއުގެ ދަށުން ތިން ބެޑްރޫމް އަދި ތިން ފާޚާނާގެ 1400 ޔުނިޓާއި، ދެ ބެޑްރޫމް އަދި ދެ ފާޚާނާގެ 600 ޔުނިޓު އެޅުމަށް ވަނީ ހަމަޖެހިފައެވެ. މި މަޝްރޫއުގެ ފައިނޭންސިންގެ 85 އިންސައްތަ ހަމަޖައްސާނީ ކޮންޓްރެކްޓަރގެ ފަރާތުންނެވެ. އަދި މި މަޝްރޫއުގެ މަސައްކަތް ފަށާތާ 900 ދުވަހުގެ ތެރޭގައި މަސައްކަތް އެއްކޮށް ފުރިހަމަކުރެވޭނެ ކަމަށް ބެލެވެއެވެ.
ރައީސުލްޖުމްހޫރިއްޔާ އިއްޔެ ދެއްވި ރިޔާސީ ބަޔާނުގައިވަނީ މި ހައުސިންގ ޔުނިޓުތަކަކީ، ކުރިން ތަރައްޤީކޮށްފައިވާ މި ގިންތީގެ ހައުސިންގ ޔުނިޓުތަކާ އަޅައި ބަލާއިރު، ސައިޒުގެ ގޮތުން ތަނަވަސް އަދި، ނިސްބަތުން އަގުވެސް ހެޔޮ ޔުނިޓުތަކަކަށްވާނެކަމަށެވެ.