ރައްޔިތުންގެ މަޖިލީހުން އިތުބާރު ނެތް ކަމުގެ ވޯޓް ނަގާ މަގާމުން ދުރުކުރި ކުރީގެ ކޮމިއުނިކޭޝަން މިނިސްޓަރު މުހައްމަދު މަލީހު ޖަމާލު އިދިކޮޅު ޕްރޮގްރެސިވް ކޮންގްރެސް ކޯލިޝަންގެ ކެންޕެއިންގައި ބައިވެރިވެއްޖެއެވެ.
އެގޮތުން މަލީހު ވަނީ ކައުންސިލް އިންތިހާބަށް ފުވައްމުލަކުގައި ޕީޕީއެމްގެ ފަރާތުން އޮފީހެއް ހުޅުވުމަށް ބޭއްވި އިވެންޓުގައި ބައިވެރިވެފައެވެ.މި އިވެންޓު ކުރިއަށް ގެންގޮސްފައިވަނީ މާލެ އާއި ފުވައްމުލަކުގައެވެ.
މަލީހުގެ އަރިހުގައި ކުރީގެ ނައިބު ރައީސް ޑރ.މުހައްމަދު ޖަމީލު ވެސް ބައިވެރިވެ ވަޑައިގެންނެވިއެވެ. އެ ދެ ބޭފުޅުންނަކީ ވެސް ފުވައްމުލަކަށް ނިސްބަތްވެ ވަޑައިގަންނަވާ ދެ ބޭފުޅުންނެވެ.
ނަމަވެސް ޖަމީލާއި މަލީހް މިއަދުގެ ބައްދަލުވުމުގައި ވާހަކަފުޅެއް ނުދައްކަވައެވެ.