ރައީސް ނަޝީދަށް ލިބުނު ގެއްލުންތަކުގެ ފޮޓޯތައް އާންމުކޮށްފި

މި މަހުގެ ހަވަނަ ދުވަހުގެރޭ ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް ދިން ހަމަލާގައި އެމަނިކުފާނުގެ ހަށިކޮޅަށް ލިބުނު ޒަހަމްތަކުގެ ފޮޓޯތައް މަޖިލީހުގެ އިދާރާ އިން މިއަދު އާންމުކޮށްފިއެވެ.

މަޖިލީހުގެ އިދާރާ އިން ބުނީ މި ފޮޓޯތައް އާންމުކޮށްފައި ވަނީ ނަޝީދުގެ އިޒުނަފުޅާއެކުގައި ކަމަށެވެ.

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ ހަށިކޮޅަށް ލިބިވަޑައިގެންފައިވާ ޒަޚަމްތައް. މި ފޮޓޯތައް އާންމުކޮށްފައި މި ވަނީ އެމަނިކުފާނުގެ އިޒުނަފުޅާއެކު ގައެވެ. pic.twitter.com/OEwe60FQKi

— People's Majlis (@mvpeoplesmajlis) May 15, 2021

މަޖިލީހުގެ އިތުރުން ރައީސް ނަޝީދުގެ ބޭބެ ޑރ. އިބްރާހިމް ނާޝިދު ވެސް ވަނީ އެ ފޮޓޯތައް ޓްވިޓާގައި ހިއްސާ ކޮށްފައެވެ.

“ހަށިކޮޅަށް ލިބިފައިވާ ޒަހަމުތައް ސީރިއަސް. އެކަމަކު އަޅުގަނޑަށް އިހުސާސް ކުރެވޭ ހިތްވަރުފުޅު ވަރުގަދަކަން،” ޑރ. ނާޝިދު ވިދާޅުވިއެވެ.

ރައީސް ނަޝީދަށް އަމާޒުކޮށް ބޮމުގެ ހަމަލާއެއް ދިނީ މިމަހުގެ ހަވަނަ ދުވަހުގެ ރޭ އެމަނިކުފާނު ދިރިއުޅުއްވާ ގ. ކެނެރީގެ ހުންނަ ނީލޯފަރު ހިނގުމުން ހިންގަވާފައި ވަޑައިގެން މަޖިީދީ މަގުގައި އޮތް ކާރުކޮޅަށް އާރަވަޑައިގަންނަވަން އުޅުއްވަނިކޮށެވެ.

އެ ހަމަލާއާ ގުޅިގެން އޭޑީކޭ ހޮސްޕިޓަލުގައި ފަރުވާ ހޯއްދެވުމަށްފަހު މިދިޔަ ބުރާސްފަތި ދުވަހު ނަޝީދު ވަނީ އިތުރު ފަރުވާ އަށް ޖަރުމަނުވިލާތަށް ފުރާވަޑައިގެންފައެވެ.

ނަޝީދަށް ދިން ހަމަލާއާ ގުޅިގެން ތިން މީހަކު މިހާތަނަށް ވަނީ ހައްޔަރުކޮށްފައެވެ. އެ ތިން މީހުންނަކީ މއ. ފޭރުގެ މުޖާޒް އަހުމަދު އާއި ގއ. ކޮނޑޭ ފޮޅޭމާ ތަހުމީން އަހުމަދު އާއި ވ. ތިނަދޫ، ހިޔާ، އަދުހަމް އަހުމަދު ރަޝީދު އެވެ. އަދުހަމް އަކީ ނަޝީދަށް ހަމަލާދިނުމަށް ތައްޔާރުކޮށްފައިވާ ޑިވައިސް ރިމޯޓެއް ބޭނުންކޮށްގެން ގޮއްވާލި ފަރާތެވެ. އަދި ތަހުމީނަކީ ބޮން ގޮއްވާލުމަށް ބޭނުން ކުރި ސައިކަލްގެ ވެރިމީހާ އެވެ.

އެ ތިން މީހުންގެ ބަންދަށް ވެސް ކްރިމިނަލް ކޯޓުން 15 ދުވަސް ވަނީ ޖަހާފައެވެ.