ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާގެ ތަހުގީގުގައި ބޮޑެތި ކުރިއެރުންތަކެއް ލިބިފައިވާ ކަމަށް ފުލުހުން ބުނެފިއެވެ.
އެ މައްސަލައިގެ ތަހުގީގާ ގުޅިގެން ފުލުހުން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި މައުލޫމާތު ހިއްސާ ކުރައްވަމުން ސުޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ ތަހުގީގުގެ ތެރެއިން އެކި ގޮތްގޮތުން 150 އަށްވުރެއް ގިނަ ފަރާތަކުން މައުލޫމާތު ހޯދާފައިވާ ކަމަށެވެ.
ފުލުހުން ބުނީ މިހާތަނަށް މި ހަމަލާއާއި ޓެރަރިޒަމާއި ހަރުކަށި ފިކުރާ ދެކޮޅަށް ކުރިއަށް ގެންދާ އޮޕަރޭޝަންގެ ތެރެއިން ޖުމުލަ 25 އަށް ވުރެއް ގިނަ ތަނެއް ބަލާ ފާސްކޮށް 14 މީހަކު ހައްޔަރު ކޮށްފައިވާ ކަމަށެވެ. އޭގެ ތެރެއިން ހަތަރު މީހަކީ ރައީސް ނަޝީދަށް ދިން ހަމަލާއާ ގުޅޭ މީހުން ކަމަށާއި، އަދި އަނެއް 10 މީހުންނަކީ ހަރުކަށި ފިކުރުގެ މައްސަލަތަކާ ގުޅިގެން ހައްޔަރު ކޮށްފައިވާ ފަރާތްތައް ކަމަށް ޝިފާއު ވިދާޅުވިއެވެ.
ފުލުހުން ބުނީ، ހަމަލާގެ ތަހުގީގު ކުރިއަށް ދަނީ ހަމަލާ ދިނުމުގައި އަމަލީ ގޮތުން ބައިވެރިވި މީހުންނާއި، ހަމަލާ ރާވާއި ހިންގި މީހުންނާއި އަދި ހަމަލާއަށް މާލީ ގޮތުން އެހީތެރިކަން ފޯރުކޮށްދިން މީހުން ވެސް ހޯދުމަށް ފޯކަސް ކޮށްގެން ކަމަށެވެ.
advertisment