ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާގައި ބޮން ގޮއްވާލި އަދުހަމް އަހްމަދު އެ ކުށަށް އިއުތިރާފްވެ އިއުތިރާފު އެއްބަސްވުމުގައި ސޮއި ކޮށްފިއެވެ.
އަދުހަމް އަކީ ހަމަލާ ދިނުމަށްޓަކައި އަތަމާ ޕެލަސްގެ ގޯޅިތެރޭ ހުރެގެން ބޮން ގޮއްވާލި މީހާ އެވެ. ފުލުހުން ބުނެފައިވާ ގޮތުގައި އަދުހަމް ހުރީ ޖާނުން ފިދާވެގެންވެސް އެ ހަމަލާ ދިނުމަށް ތައްޔާރަށް ކަމަށް ތަހުގީގަށް ވަނީ އެނގިފައިވާ ކަމަށެވެ.
ޕްރިސިކިއުޓަރ ޖެނެރަލް ހުސައިން ޝަމީމް މިއަދު ބޭއްވި ޕްރެސް ކޮންފަރެންސްގައި ވިދާޅުވީ، އަދުހަމަށް ހަތަރު ދައުވާ އެއް ކުރެވޭކަމަށެވެ. އެއީ ޓެރަރިޒަމްގެ އަމަލެއް ކުރުމުގެ ކުށުގެ ދައުވާ އާއި ޓެރަރިޒަމްގެ އަމަލެއް ކުރަން ރޭވުމުގެ ކުށުގެެ ދައުވާ އާއި ޓެރަރިސްޓް ޖަމާއަތަކަށް ތާއީދުކުރުމުގެ ކުށުގެ ދައުވާ އާއި ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްދުގައި މީހަކު މަރާލަން އުޅުމުގެ ކުށުގެ ދައުވާ އެވެ.
އޭނާ ކުށަށް އިއުތިރާފުވެ އިއުތިރާފް އެއްބަސްވުމުގައި ސޮއި ކޮށްފައިވާކަމަށްވެސް ޝަމީމް ވިދާޅުވިއެެވެ.
އަދުހަމާއެކު އިއުތިރާފް އެއްބަސްވުމުގައި ސޮއިކޮށްފައިވަނީ އިއްޔަ ކަމަށާއި، އިއުތިރާފް އެއްބަސްވުމުގެ ސަބަބުން އޭނާއަށް 23 އަހަރުގެ ޖަލު ހުކުމެއް އަންނަނާނެކަމަށް ޝަމީމް ވިދާޅުވިއެވެ.
advertisment