ގދ. ތިނަދޫ ބާޒާރުގައި ވިއްކަންހުރި ގޮދަންފުށެއް ބޭނުން ނުކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އަންގައިފިއެވެ.
އެމްއެފްޑީއޭއިން ބޭނުން ނުކުރުމަށް އަންގާފައިވަނީ ” ޕްރިމަ ސިލޯން” ބްރޭންޑުގެ ގޮދަން ފުށެކެވެ. އެއީ ތިނަދޫގައި ރައްކާކޮށްފައިހުރި އެ ބްރޭންޑުގެ ގޮދަންފުށުން ގިނަ އަދަދަކަށް އުކުނާއި ފަނިހުރިކަން ކަށަވަރުވެފައިވާތީކަމަށް އެމްއެފްޑީއޭ އިން ވަނީ ބުނެފައެވެ.
އެމްއެފްޑީއޭއިން ހާމަކޮށްފައިވާގޮތުގައި މައްސަލަ ފާހަގަވެފައިވަނީ “ޕްރިމަ ސިލޯން” ބްރޭންޑުގެ ބެޗް ނަންބަރު MD2021003 ގައެވެ.
އެމްއެފްޑީއޭ އިން ވަނީ މި ބްރޭންޑްގެ އެ ބެޗްގެ ފުށް ނުވިއްކުމަށާއި، ބޭނުން ނުކުރުމަށް އަންގައިފައެވެ. އަދި ރައްކާތެރިކަމުގެ ފިޔަވަޅެއްގެ ގޮތުން އެ އޮތޯރިޓީން އެހެން ބެޗްތަކުގެ ސުންކު ނަގާ ޓެސްޓު ކުރުމުގެ މަސައްކަތް ކުރަމުންދާކަމަށްވެސް އެމްއެފްޑީއޭއިން ވަނީ ހާމަކޮށްފައެވެ.