ކުރީގެ ރައީސް އަބްދުﷲ ޔާމީން ދިވެހި ގައުމީ ފުޓްބޯޅަ ޓީމުގެ ކުޅުންތެރިންނަށް ހިތްވަރު ދެއްވުމުން ޔޫތު މިނިސްޓަރު އަހުމަދު މަހުލޫފް އެމަނިކުފާނަށް ޝުކުރު އަދާކުރައްވައިފި އެވެ.
ޔާމީންގެ ގެކޮޅު ކުރިމަތިން ޤައުމީ ޓީމު ބަހުގައި ދަތުރުކުރި އިރު އެމަނިކުފާނު ވަނީ ގެކޮޅުގައި ހުންނަވައިގެން އަތުން އިޝާރާތް ކުރައްވައި ކުޅުންތެރިންނަށް ހިތްވަރު ދެއްވާފައެވެ. އެމަނިކުފާނު އޭރު ހުންނެވީ ޤައުމީ ޓީމުގެ ޖާޒީ ތުރުކުރައްވައިގެންނެވެ.
އެކަމާ ގުޅިގެން މަހުލޫފް ވިދާޅުވީ ކުޅިވަރަކީ ސިޔާސީ ފިކުރު ނައްތާލާ ކަމެއް ކަމަށާއި ޔާމީން ވެސް ހިތްވަރު ދެއްވުމަކީ ޓީމަށް ލިބޭނެ އިތުރު ޖޯޝެއްކަމުން އެމަނިކުފާނަށް ޝުކުރު އަދާކުރައްވާ ކަމަށެވެ.
އުރީދޫ ސާފް ޗެމްޕިއަންޝިޕްގެ ލީގު ބުރުގެ ފަހު މެޗުގައި ރާއްޖެ އިން މިރޭ އިންޑިއާއާ ދެކޮޅަށް ނިކުންނާނެ އެވެ. މި މެޗު އެއްވަރުކޮށްލައިގެން ވެސް ރާއްޖެ އަށް މުބާރާތުގެ ފައިނަލަށް ދެވޭނެއެވެ.