ސިވިލް ކޯޓަށް ހުށަހަޅާފައިވާ މައްސަލައަކާ ގުޅިގެން އެ ކޯޓަށް ހާޒިރުކުރަން ބޭނުންވެ ޙާޒިރުކުރެވިފައިނުވާތީ ކ. މާލެ/ ވ. ރާހި، މުޙައްމަދު ބާޤިރު (50އ) ހޯދަން ފުލުހުން މިއަދު ވެސް އިއުލާން ކޮށްފިއެވެ.
ފުލުހުން ބުނީ، ބާގިރު ހޯދަމުން ދަނީ ސިވިލް ކޯޓުގައި ދައުވާކުރާ ހުކުމް ތަންފީޒުކުރުމުގެ މައްސަލައަކާ ގުޅިގެން އެ ކޯޓަށް ހާޒިރުކުރެވިފައި ނުވާތީވެ، މިމަހުގެ އަށްވަނަ ދުވަހުގެ ހެނދުނު 9:30 އަށް އެކޯޓަށް އޭނާ ހާޒިރު ކޮށްދިނުމަށް އެދި ފުލުހުންގެ މައްޗަށް ކޮށްފައިވާ އަމުރާ ގުޅިގެން ކަމަށެވެ.
ބާގިރާއި އޭނާގެ ކުރީގެ އަންހެނުން ޒީނިޔާ މުހައްމަދު ޒާހިރު ހޯދަން ފުލުހުން މިދިޔަ މަހުގެ ފަހުކޮޅު އިއުލާނު ކުރިއެވެ. އެ އިއުލާނާ ގުޅިގެން ޒީނިޔާ ފޭސްބުކްގައި ބުނީ، އޭނާއާއި ބާގިރު ކޯޓަށް ހާޒިރު ކުރަނީ ދެމީހުން ކައިވެނި ކޮށްގެން އުޅުނު އިރު، ޒީނިޔާގެ 1 ޕަސެންޓު ހިއްސާ އޮންނަ ގޮތަށް ބާގިރު އުފެއްދި ކުންފުނީގެ ދަރަނީގެ މައްސަލަތަކުގައި ކަމަށެވެ.
ބާގިރު މިހާރު އުޅެނީ އިނގިރޭސިވިލާތުގައި ކަން ކަމާބެހޭ ފަރާތްތަކަށް އެނގި އޭނާ ހޯދަން އިންޓަޕޯލްގެ ރެޑް ނޯޓިސްވެސް ނެރެފައި އޮންނަތާ ދުވަސްތަކެއް ވެއްޖެއެވެ.