ވިލިމާލޭގައި ހުންނަ ކުޑަކުދިންގެ ހިޔާގެ ވަޒީފާގައި ތިބި 21 މުވައްޒަފަކު ވަކިކުރަން ދިން ނޯޓިސް ޖެންޑާ މިނިސްޓްރީން މިއަދު ބާތިލްކޮށްފިއެވެ.
ޖެންޑާ މިނިސްޓްރީން ނޯޓިސްތައް ބާތިލް ކުރީ، ސިވިލް ސާވިސް ކޮމިޝަނުން، އެ ނޯޓިސްތައް ބާތިލް ކުރަން ޖެންޑާ މިނިސްޓްރީއަށް އެންގުމުންނެވެ. އެއާއެކު ޖެންޑާ މިނިސްޓްރީން ވަނީ، ނޯޓިސް ދިން 21 މުވައްޒަފުންނަށް، ނޯޓިސް ބާތިލް ކުރި ކަމަށް އަންގާ ސިޓީ ފޮނުވާފައެވެ.
މުވައްޒަފުން ވަކިކުރި މައްސަލާގައި އެ މުވައްޒަފުން ވަނީ އެކަމުގެ ކަންބޮޑުވުން ކަމާ ގުޅުންހުރި އިދާރާތަކާ ހިއްސާކޮށްފައެވެ. އެކަންބޮޑުވުންތައް ސިވިލް ސާވިސް ކޮމިޝަން (ސީއެސްސީ)އަށް ހުށަހެޅުމުން، އެ ކޮމިޝަނުން ވަނީ މުވައްޒަފުން ވަކިކުރުމުގެ ނޯޓިސް ބާތިލްކުރަން ޖެންޑާ މިނިސްޓްރީއަށް އަންގާފައެވެ.
މިކަމާއި ގުޅިގެން ސިވިލް ސާރވިސް ކޮމިޝަނުން ބުނީ، އެ މުވައްޒަފުން ވަކިކުރުމުގެ މަރުހަލާ އިޖުރާއަތްތައް ޖެންޑާއިން އެންމެ ރަނގަޅަށް ފުރިހަމަކޮށްފައިނުވާކަމަށެވެ.