މަޑުޖައްސާލުމަށް އަންގާފައިވަނިކޮށް ޕާކިން ސްލޮޓްތަކަށް ކުރިމަތިލުމަށް ކައުންސިލްއިން އިއުލާންކުރަނީ

ޓްރާންސްޕޯޓް މިނިސްޓްރީއާއި އެލްޖީއޭއިން މިފަދައިން އަންގާފައިވަނިކޮށް މާލެ ސިޓީ ކައުންސިލްގެ ފަރާތުން މާލޭގައި ތަރައްގީކޮށްފައިވާ ޕާކިންގސްލޮޓްތަކަށް ކުރިމަތި ލުމުގެ ފުރުސަތު 16 ފެބްރުއަރީ 2022 ވާ ބުދަ ދުވަހުން ފެށިގެން ހުޅުވާލާނެކަން މިއަދު ވަނީ އިއުލާންކޮށްފައެވެ. އެކަމަށް ޤާއިމްކުރެވިފައިވާ އޮންލައިން ޕޯޓަލް މެދުވެރިކޮށް ކުރިމަތިލުމުގެ ފުރުސަތު މިމަހުގެ 16 ވަނަ ދުވަހުން ފެށިގެން އޮންނާނެކަމަށް ސިޓީ ކައުންސިލްއިން ބުނެއެވެ.

މި ޕާކިންގ ސްލޮޓްތަކަކީ މަހު ފީގެ ގޮތުގައި އަގު ނަގާގޮތަށް ކުއްޔަށް ދޫކުރެވޭ ސްލޮޓްތަކެކެވެ. މި ސްލޮޓްތަކުގެ ތެރޭގައި ޕްރައިވެޓް ކާރުތަކަށާއި، މާލޭގައި ދުއްވާ ޓެކްސީތައް އަދި 3.5 ޓަނުގެ ޕިކަޕްތަކަށް ޙާއްސަ ސްލޮޓްތައް ހިމެނޭނެއެވެ. ޤާއިމު ކުރެވިފައިވާ ޕާކިންގ ސްލޮޓުތަކުގެ ތެރެއިން %25 ( ފަންސަވީސް ޕަސެންޓް ) ޙާއްސަކުރެވިފައި ވާނީ މާލޭގައި ދުއްވާ ޓެކްސީތަކަށެވެ. ކޮންމެ ފަރުދަކަށްވެސް ތަފާތު ތިން ސަރަހައްދަކުން ޖާގައަށް އެޕްލައި ކުރެވޭނެއެވެ. މި ހުޅުވާލެވޭ ފުރުޞަތުތަކުގެ ތެރޭގައި ގަރާޖުގެ ގޮތުގައި ސްލޮޓް ރެޖިސްޓްރީ ކުރުން ނުހިމެނޭކަމަށް ސިޓީ ކައުންސިލްއިން ބުނެއެވެ.

މިމުއާމަލާތް މިގޮތަށް ކުރިއަށް ނުގެންދެވޭނެކަން ޓްރާންސްޕޯޓް މިނިސްޓްރީއިން އެންގުމާއި ގުޅިގެން ސިޓީ ކައުންސިލްގެ މެމްބަރުން އަންނަނީ އެކަމާއި ގުޅިގެން ކަންބޮޑުވުން ފާޅުކުރަމުންނެވެ. އެގޮތުން ސިޓީ ކައުންސިލަށް ލިބިފައިވާ ބާރުތައް ބޭނުންނުކުރެވޭ ކަމުގައިވާނަމަ މިސަރުކާރުން ތަސްދީގްކުރި ލާމަރުކަޒީ ގާނޫނުގެ ބޭނުމެއް ކޮބައިތޯ އަންނަނީ ސުވާލު ކުރަމުންނެވެ.