ކުރީގެ ރައީސް އަބްދުﷲ މައުމޫން އަބްދުލްގައްޔޫމްގެ މޯލްޑިވްސް ރިފޯމް މޫވްމަންޓް ޕާޓީއަށް 3000 މެންބަރުން ހަމަކޮށްފިކަމަށް އިލެކްޝަންސް ކޮމިޝަނުން ބުނެފިއެވެ.
އީސީން ވަނީ 3000 މެންބަރުން ހަމަނުވާ ޕާޓީތައް މި މަހުގެ 14 ގެ ކުރިން މެންބަރުން ހަމަނުވެއްޖެނަމަ އުވާލާނެކަމަށް ބުނެ މިފަދަ 4 ޕާޓީއަކަށް ނޯޓިސް ދީފައެވެ. އޭގެ ތެރޭގައި މޯލްޑިވްސް ރިފޯމް މޫވްމަންޓްވެސް ހިމެނެއެވެ.
އެމްއާރުއެމްއަށް މީހުން ހަމަވުމާއި ގުޅިގެން ޓްވީޓެއްކޮށް އިލެކްޝަންސް ކޮމިޝަނުން ބުނެފައިވަނީ ސިޔާސީ ޕާޓީގެ ޤާނޫނުގެ 28 ވަނަ މާއްދާގެ (ނ) ގައިވާ ގޮތުގެމަތިން، މޯލްޑިވްސް ރިފޯމް މޫވްމަންޓް އިން 3000 މެންބަރުން ހަމަކޮށްފިކަމަށެވެ.
ސިޔާސީ ޕާޓީގެ ޤާނޫނުގެ 28 ވަނަ މާއްދާގެ (ނ) ގައިވާ ގޮތުގެމަތިން، މޯލްޑިވްސް ރިފޯމް މޫވްމަންޓް އިން 3000 މެންބަރުން ހަމަކޮށްފި.
— Elections Commission (@ElectionsMv) June 12, 2022
މީގެ ކުރިން އެމްއާރުއެމްއިން ބުނެފައިވާ ގޮތުގައި ޕާޓީއަށް މީހުން ހަމަ ނުވަނީ އިލެކްޝަންސް ކޮމިޝަނަށް ހުށައަޅާ ފޯމްތައް ޕްރޮސެސް ނުކުރާތީއެވެ. ނަމަވެސް މިކަމާއި ގުޅިގެން ކޮމިޝަނުން ބުނެފައިވަނީ ޕްރޮސެސްކުރުމުގައި ބަލަނީ ފޯމް ހުށައަޅާ ތަރުތީބަށްކަމަށާއި ނަމަވެސް މިހާރު ފޯމްތައް ޕްރޮސެސްކުރަމުން ދަނީ މެންބަރުން ހަމަނުވެއްޖެނަމަ މި މަހުގެ 14 ގައި އުވާލުމަށް ނޯޓިސް ދެވިފައިވާ ޕާޓީތަކަށް އިސްކަން ދީގެންކަމަށެވެ. އެގޮތުން އެމްއާރުއެމްގެ ގިނަ ފޯމްތަކެއް ލިބިފައިވާތީ މިހާރު ކުރިއަށް ދަނީ އެ ފޯމްތަކުގެ މަސައްކަތްކަމަށެވެ.