ރައީސް ސާލިޙް ވެރިކަމުގެ ދެވަނަ ދައުރަކަށް ކުރިމަތި ލެއްވުމަކީ އެމްޑީޕީއަށް ރަނގަޅު ގޮތެއް ނޫން: ރައީސް ނަޝީދު

ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙް ވެރިކަމުގެ ދެވަނަ ދައުރަކަށް ކުރިމަތި ލެއްވުމަކީ އެމްޑީޕީއަށް ރަނގަޅު ގޮތެއް ނޫން ކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

“އާސްކް ސްޕީކަރ” ޕްރޮގުރާމުގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ 2018 ވަނަ އަހަރު ރައީސް އިބްރާހިމް މުހައްމަދު ސާލިޙް ވެރިކަމަށް ކުރިމަތި ލެއްވިއިރު މިހާރުގެ ފޮރުން މިނިސްޓަރ އަބްދުﷲ ޝާހިދު އެމަނިކުފާނާއި ބައްދަލު ކުރައްވައި އެމްޑީޕީގެ ޓިކެޓުގައި ރިޔާސީ އިންތިހާބުގައި ވާދަ ކުރައްވަން އެދިވަޑައިގެންނެވި ކަމަށެވެ. ނަމަވެސް އެއީ އެމަނިކުފާނަށް ފެނިވަޑައިގަންނަވާ ކަމެއް ނޫން ކަމަށް އޭރު ޝާހިދުގެ އަރިހުގައި ދެންނެވި ކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ ޝާހިދު 2018 ވަނަ އަހަރުގެ ރިޔާސީ އިންތިހާބުގައި ވާދަ ކުރައްވަން ހުށަހެޅުއްވުމުން ޝާހިދުގެ ބަދަލުގައި ވާދަ ކުރެއްވުން އެންމެ ރަނގަޅު ބޭފުޅަކީ މިހާރުގެ ރައީސް އިބްރާހިމް މުހައްމަދު ސާލިޙް ކަމަށް ޝާހިދުގެ އަރިހުގައި ދެންނެވި ކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ 2018 ވަނަ އަހަރު ޝާހިދުގެ ބަދަލުގައި އިންތިހާބުގައި ވާދަ ކުރެއްވުން އެންމެ ރަނގަޅު ބޭފުޅަކީ ރައީސް ސާލިޙް ކަމަށް ވިދާޅުވިއިރު ޝާހިދުއަކީ ވެސް ރާއްޖޭގެ ވެރިކަމަށް އަންނަން ބޭނުންވާ ހުރިހައި ރުކުނެއް ފުރިހަމަވާ ބޭފުޅެއްކަން އެމަނިކުފާން ގާބުކު ކުރެއްވި ކަމަށެވެ.

ރައީސް ނަޝީދު ވިދާޅުވީ ކުރިއަށް އޮތް ރިޔާސީ އިންތިހާބުގައި ރައީސް ސާލިޙްއާއި އެމަނިކުފާންގެ ބަދަލުގައި ނިކުންނަން ޖެހޭނީ އެހެން ބޭފުޅެއްތޯ ނުވަތަ ތިން ވަނަ ފަރާތެއްތޯ އެމްޑީޕީގެ މެމްބަރުން ވަރަށް ބޮޑަށް ވިސްނަން ޖެހޭ ކަމަށެވެ. އަދި ކުރިއަށް އޮތް ދުަވަސްތަކުގައި އެމްޑީޕީގެ މެމްބަރުން އެކަމުގައި ގޮތެއް ނިންމަވާނެ ކަމަށް ވެސް ރައީސް ނަޝީދު ވިދާޅުވިއެވެ.

މީގެއިތުރުން ރައީސް ނަޝީދު ވިދާޅުވީ އެމަނިކުފާން އަބަދުވެސް އިންތިހާބުތަކުގައި ވާދަ ކުރައްވަނީ ކާމިޔާބް ވާނެ ކަމުގެ ޔަގީންކަމާއި އެކުގައި ކަމަށާއި ކުރިއަށް ހުރި އިންތިހާބުތަކުގައި ވެސް އެމަނިކުފާން ވާދަ ކުރައްވައި ކާމިޔާބް ކުރައްވާނެ ކަމަށް ރައީސް ނަޝީދު ވިދާޅުވިއެވެ.

އަންނަ އަހަރު ބާއްވާ ރިޔާސީ އިންތިހާބުގައި ގިނަ ކެނޑިޑޭޓުން ވާދަކުރާނެކަމަށް ބެލެވޭއިރު، ވެރިކަން ކުރާ އެމްޑީޕީގެ އެތެރޭގައި އޮތީ ވަރަށް ބޮޑެތި ހިޔާލުތަފާތުވުން އުފެދިފަ އެވެ. ހާއްސަކޮށް އިންތިހާބުގައި ވާދަކުރެއްވުމުގެ ޝައުގުވެރިކަން ގެންގުޅުއްވާ ރައީސް މުހައްމަދު ނަޝީދަށް އެ ފުރުސަތު ނުލިބޭނެކަމަށް ދޭހަވާ މޭރުމަކުން ޕާޓީގެ އެތެރޭގައި ވާހަކަތައް ދެކެވޭއިރު ރައީސް ސޯލިހު ވަކީން ނިކުމެ އިންތިހާބު ކާމިޔާބު ކުރަން އުނދަގޫވާނެ އެވެ.

ވެރިކަމަށް ހަތަރު އަހަރުވާން ގާތްވެރިވާއިރު، ކޯލިޝަން ދަމަހައްޓައި ޕާޓީތަކުން ލޮބީ ކުރާ ކަންކަން ސަރުކާރުން ކުރައްވަނީ މި ސަބަބާއި ހުރެކަމަށް ބެލެވެ އެވެ. އަދި ރައީސް ސޯލިހާއި، އެމަނިކުފާނާއި އަރިސް މެމްބަރުން ކޯލިޝަނުގެ ވަޒީރުން ވަރަށް ބޮޑަށް ދިފާއު ވެސް ކުރައްވަ އެވެ.

ޕްރެސް އެއް ނުބާއްވާތާ ނުވަ މަސް ފަހުން މީޑިއާތަކާއި އެކު އޮތް ބައްދަލުވުމުގައި، ނޫސްވެރިއެއްގެ ސުވާލަށް ރައީސް ވިދާޅުވީ އެންމެ މުހިންމީ އެމްޑީޕީ އިތުރު ދައުރަކަށް ހޮވި، ވެރިކަމަށް އައުން ކަމަށެވެ. އަދި ހިނގަމުންދާ މަޝްރޫއުތަކަށް އެއްވެސް މަޑުޖެހުމެއް ނައިސް ކުރިޔަށް ދިއުމުގެ ފުރުސަތު ދޭން ޖެހޭކަމަށް އިޝާރާތް ކުރައްވައި ރައީސް ސޯލިހު ވިދާޅުވީ، އެއްވެސް ޕާޓީއަކަށް އެކަނި ރިޔާސީ އިންތިހާބެއް ކާމިޔާބު ނުކުރެވޭނެކަން ކަމަށާއި ގިނަ ޕާޓީތަކެއް އެކުވެގެން ނޫނީ ވެރިކަމަށް ނާދެވޭނެކަމަށެވެ.

ރައީސް ސޯލިހު ވިދާޅުވީ، އެމްޑީޕީ އިސްވެ އޮވެ ކޯލިޝަނަކާއިއެކު ނުކުމެވަޑައިގެން އެ މަނިކުފާނަށް 2023 ގެ ރިޔާސީ އިންތިހާބު ކާމިޔާބު ކުރެއްވޭނެކަމުގެ ޔަގީންކަން އެބައޮތްކަމަށެވެ.