ޝިއާގެ މަރު: ޕޯސްޓްމޯޓަމް ހެދުމަށް ހަށިގަނޑު ރާއްޖެއިން ބޭރަށް

އަނިޔާވެރި ގޮތަކަށް މަރާލާފައިވަނިކޮށް ފެނުނު ޝިއާއު މުހައްމަދު ސައީދު (ޝިއާ) ގެ ހަށިގަނޑު ޕޯސްޓް މޯޓަމް ހަދަން ފޮނުވައިފިއެވެ.

ފުލުހުން ބުނީ ޝިއާގެ ހަށިގަނޑު ޕޯސްޓް މޯޓަމް ހެދުމަށް މިއަދުގެ ވަގުތެެއްގައި ރާއްޖެއިން ބޭރަށް ފޮނުވިފައިވާ ކަމަށެވެ. ޝިއާގެ ޕޯސްޓްމޯޓަމް ހެދުމަށް ހަށިގަނޑު ފޮނުވާފައި ވަނީ އިންޑިއާއަށެވެ.

ޝިއާގެ މަރުގެ މައްސަލައިގައި ފުލުހުން އަދި މިހާތަނަށް މާ ބޮޑު މައުލޫމާތެއް ހިއްސާކޮށްފައެއް ނުވެއެވެ. ހާދިސާ ހިނގި ދުވަހު ނޫސްވެރިންގެ ބައްދަލުވުމެއް ބާއްވައި ފުލުހުން ބުނީ ޝާހިލް ކުށަށް އިއުތިރާފުވެފައި ނުވާކަމަށެވެ. އަދި އޭނާ ހައްޔަރު ކުރި ވަގުތު ހުރީ މަސްތުގެ ހާލަތުގައިކަމަށް ބުންޏެވެ.

ފުލުހުން ބުނީ ޝިއާ މަރާލާފައި ވަނީ ވަރަށް އަނިޔާވެރިކޮށް ކަމަށާއި، އާއިލާގެ އެންމެ ބޮޑު އެދުމަކީ އަންހެން ކުއްޖާގެ ފޮޓޯތަކާއި، އަދި ކަށަވަރު ނުވާ ވާހަކަތައް ސޯޝަލް މީޑިއާގައި ނުދެއްކުން ކަމަށެވެ.

ޝިއާގެ މަރުގެ މައްސަލައިގައި އަލީ ޝާހިލް ހައްޔަރު ކުރީ ކުށުގެ ވެށިންނެވެ.

ޝިއާގެ ހަށިގަނޑު ނައްތާލަން ނުވަތަ ފޮރުވަން ޝާހިލް މަސައްކަތް ކޮށްފައިވާ ކަމަށް ބެލެވޭ ކަމުގައި މައުލޫމާތު އެނގޭ މީހުން ބުނެއެވެ.