ރާއްޖެތެރޭގެ 80 އިންސައްތަ މީހުން މުނިފޫހި ފިލުވަނީ ބަރަހަނާ މަންޒަރުތައް ފެންނަ ވީޑިއޯތައް ބަލައިގެންކަމަށް އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒު އިސްމާޢިލް ވިދާޅުވިކަމަށް ނޫހަކުން ރިޕޯޓުކޮށްފައި އޮތަސް އެއީ ކަނޑައެޅިގެން ދޮގެއްކަމަށް މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައްޔިތުން މަޖިލީހުގެ ވަޓްސްއަޕް ގުރޫޕުގައި ރައީސް ނަޝީދު އެކަން ދޮގުކޮށްފައިވާ ސްކްރީންޝޮޓްތަކެއް ”ސަންގު“ އަށް ވަނީ ލިބިފައެވެ.
މިނިސްޓަރު ފައްޔާޒު އެހްން ވިދާޅުވިކަމަށް ”’ދިޔަރެސް“ ނޫހުގައި ލިޔެފައިވާ ޚަބަރުގެ ލިންކު މަޖިލީހުގެ ވަޓްސްއެޕް ގުރޫޕަށް ހިއްސާކުރައްވައި ރައީސް ނަޝީދު ޓެގުކޮށް މަހިބަދޫ ދާއިރާގެ މެންބަރު އަޙްމަދު ތޯރިޤު ވަނީ މިނިސްޓަރެއްގެ މަޤާމުގައި ހުރެ އެފަދަ ވާހަކައެއް ދައްކަން ލަދުވެތި ވާންޖެހޭ ކަމެއް ކަމުގައި ވިދާޅުވެފައެވެ.
”ވަޒީރުން މި ފެންވަރުގެ ވާހަކަތައް އަތޮޅުތެރޭގެ ރައްޔިތުންނަށް ނިސްބަތްކޮށް ދެއްކުމަކީ ލަދުވެތިކަމެއް” ތޯރިޤު ލިޔުއްވާފައިވެއެވެ.
މެންބަރު ތޯރިޤުގެ މެސެޖަށް ރައްދު ދެއްވަމުން ރައީސް ނަޝީދު ވިދާޅުވީ ”ދިޔަރެސް” އަކީ ނޫހެއް ނޫންކަމަށާއި ކަނޑައެޅިގެން ދޮގުހެދުމުން އެއްްވެސް މަޖަލެއް ނޫންކަމަށެވެ. އަދި މިނިސްޓަރު ފައްޔާޒު އެފަދަ ވާހަކައެއް ނުދައްކަވާ ކަމަށް އެ މެސެޖުގައި ވެއެވެ.
”ތޯރިޤް. ދިޔަރެސް އަކީ ނޫހެއް ނޫން. ކަނޑައެޅިގެން ދޮގުހެދީމަ މަޖަލެއްވެސް ނޫން . ފަޔާ އެ ބައިވަތުގެ ވާޙަކައެއް ނުދައްކާ . ….. ނަން ގެނައީވެސް އެހެން މީހެއް.” ރައީސް ނަޝީދުގެ ރައްދު މެސެޖުގައި ވެއެވެ.
މިނިސްޓަރު ފައްޔާޒް ރާއްޖެތެރޭ ރައްޔިތުންނަށް ނިސްބަތްކޮށް މިފަދަ ވާޙަކައެއް ދެއްކިކަމަށް ނޫހަކުން ރިޕޯޓު ކުރުމާއެކު ރައްޔިތުންގެ ނުރުހުން މިނިސްޓަރު ފައްޔާޒަށްވަނީ އަމާޒުވެފައެވެ.
advertisment