ކުރީގެ ރައީސް އަބްދުﷲ ޔާމީން އަބްދުލް ގައްޔޫމުގެ ޝަރީއަތުގައި ޕްރޮސެކިއުޓާރ ގެނެރަލްގެ އޮފީހުން، ޕީޖީ ހުސައިން ޝަމީމް ހާޒިރުވެ ހުންނެވުން މުހިންމުކަމަށް އެސްޓީއޯގެ މެނޭޖިންގް ޑިރެކްޓަރު ހުސައިން އަމްރު ވިދާޅުވެއްޖެއެވެ.
ރައީސް ޔާމީންގެ ޝަރީއަތް ކުރިއަށް ގެންދިއަ ވަގުތު، ޕީޖީ އޮފީހުގެ ފަރާތުން ހާޒިރުވެތިބި ވަކީލުންތަކެއް، ޝަރީއަތުގެ މަޖިލީހުގައި ސަކަރާތްޖަހައި، ރައީސް ޔާމީނަށާއި، ގާޒީއަށްވެސް އިހުތިރާމް ކުޑަވާ ގޮތަށް އަމަލުކޮށްފައިވާ ކަމަށް އިޝާރާތްކުރައްވާ އަމްރުވަނީ، އެކަމާއި ކަންވޮޑުވުން ފާޅުކުރައްވާފައެވެ.
އަމްރު ވިދާޅުވީ، ރައީސް ޔާމީންގެ ޝަރީއަތަކީ، ކުރީގެ ރައީސްއެއްގެ ޝަރީއަތް ކަމަށެވެ. އަދި އޭގެ އިތުރުން އެ ޝަރީއަތަކީ، ރާއްޖޭގެ ތާރީހުގައި ހިންގާފައިވާ އެންމެ ބޮޑު ހިޔާނާތުގެ މައްސަލައިގައި ކުރެވޭ ޝަރީއަތް ކަމަށްވުމުން، ކޮންމެ ކޮންމެ ވަކީލެއްގެ ބަދަލުގައި، ސީދާ ޕީޖީ ޝަމީމު އެ ޝަރީއަތުގައި ޕީޖީ އޮފީހުގެ ފަރާތުން ހާޒިރުވުން މުހިންމުކަމަށް އަމްރު ފާހަގަކުރެއްވިއެވެ.
ކުރީގެ ރައީސެއްގެ ޝަރީއަތް އަދި ރާއްޖޭގަ ހިނގި އެންމެ ބޮޑު ޚިޔާނާތުގެ ޝަރީއަތަށް ޕްރޮސެކިއުޓަ ޖެނެރަލް އޮފީހުގެ ފަރާތުން ސީދާ ޕްރޮސެކިއުޓަ ޖެނެރަލް ވަޑައިގަތުން މުހިއްމު.
މި ޝަރީއަތް ވަރަށް ގާތުން ބަލަމުން މިދަނީ. https://t.co/Bm5RnVmvPM— Amr 🎈 (@HusenAmr) September 8, 2022
މީގެ އިތުރުން އަމްރު ވިދާޅުވީ، އެނާ ގެންދަވަނީ ރައީސް ޔާމީންގެ ޝަރީއަތް ގާތްކޮށް ބައްލަވަމުންކަމަށެވެ.
ރައީސް ޔާމީންގެ ޝަރީއަތް ކުރިއަށްގެންދިޔަ ވަގުތު ޕީޖީ އޮފީހުގެ ފަރާތުން ހާޒިރުވެތިބި ވަކީލުން ޝަރީއަތުގެ މަޖިލީހުގައި ސަކަރާތް ޖެހި މައްސަލައިގައި ގާޒީ ޝަކީލް ވަނީ ވަކީލުންނަށް ނަސޭހަތްތެރިވެވަޑައިގެންފައިއެވެ. އަދި އެފަދަ އަމަލެއް ތަކުރާރުވެއްޖެ ހާލަތެއްގައި ފިޔަވަޅު އަޅުއްވާނެކަމަށްވެސް ވިދާޅުވިއެވެ.