ނަޝީދުގެ ތުހުމަތު: ދަފްތަރު ގަޑުބަޑު ކުރީ ރައީސް، ގެއްލުވާލީ ވޯޓު ނުދޭނެހެން ހީވާ މީހުން!

އަންނަ އަހަރުގެ ރިޔާސީ އިންތިހާބުގައި އެމްޑީޕީގެ ޓިކެޓުގައި ވާދަ ކުރާނެ ކެނޑިޑޭޓެއް ހޮވުމަށް ބާއްވާ ޕްރައިމެރީއާއި ދިމާކޮށް ދަފްތަރުން ވަކި ކުރި މެމްބަރުންނަކީ ރައީސް އިބްރާހިމް މުހައްމަދު ސޯލިހަށް ވޯޓު ނުދޭނެހެން ހީވާ އެމްޑީޕީގެ އަސްލު މެމްބަރުންކަމަށް ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ޖެނުއަރީ 28 ގައި ބޭއްވުމަށް ހަމަޖެހިފައި ވާ އެމްޑީޕީގެ އެތެރޭގެ އިންތިހާބަށް އަމާޒުކޮށް ޕާޓީގެ ދަފްތަރުން މެމްބަރުން އުނި ކުރިކަމުގެ ތުހުމަތުތައް ދަނީ ކުރެވެމުންނެވެ. އަދި އޭގެ އެންމެ ބޮޑު ބޭނުމަކީ އިންތިހާބަށް ނުފޫޒު ފޯރުވައި، ރައީސް ނަޝީދަށް ލިބެން ހުރި ވޯޓުތައް ގެއްލުވާލުންކަމަށް އެމަނިކުފާނާއި އަރިސް މެމްބަރުން ވިދާޅުވެ އެވެ.

ޕާޓީގެ ސާޅިސް ހާހެއް ހާ މެމްބަރުން އެގޮތަށް ވަކި ކުރިކަމަށާއި، މިއީ އިންތިހާބުގެ ނަތީޖާއަށް އަސަރު ކުރާނެ ސަބަބެއްކަން ފާހަގަކޮށް ޕާޓީގެ ޗެއާޕާސަނަށް އެޑްރެސް ކުރައްވައި ސިޓީއެއް ފޮނުވުމުން އެމަނިކުފާނަށް ރައްދު ދީ އެމްޑީޕީގެ ސެކްރެޓޭރިއޭޓުން ބަޔާނެއް އާއްމު ކުރި އެވެ.

މައްސަލަ ގޯސްވެފައި ވަނިކޮށް އަނެއްކާވެސް މިއަދު ރައީސް ނަޝީދު ވިދާޅުވީ އެމްޑީޕީއަކީ މިިނިވަން އިންތިހާބުތަކަށް ތާއީދު ކުރާ ޕާޓީއެއް ކަމަށެވެ. އަދި ކަށަވަރު ކުރެވިފައިވާ ވޯޓަރުންގެ ލިސްޓެއް އެފަދަ އިންތިހާބެއް ބޭއްވުމުގައި މުހިންމު ރޯލެއް އަދާ ކުރާކަމަށް ރައީސް ނަޝީދު ވިދާޅުވި އެވެ.

MDP is about free and fair elections. Integral to this is a pre-decided voter list. But Pres Solih has expelled over 39k members from MDP in the past year. While the list needed cleaning up, he has removed all the original party members less likely to vote for him.

— Mohamed Nasheed (@MohamedNasheed) December 21, 2022

ރައީސް ނަޝީދު ވިދާޅުވީ، ރައީސް ސާލިހު އިސްވެ ހުންނަވައި ޕާޓީން ވަކި ކުރި މެމްބަރުންގެ އަދަދު ތިރީސް ނުވަ ހާހުން މައްޗަށް އަރާ ކަމަށެވެ. އަދި އެކަން ފެށީ މިދިޔަ އަހަރުގެ ތެރޭގައިކަމަށް ތުހުމަތުކޮށް ރައީސް ނަޝީދު ވިދާޅުވީ އެގޮތަށް ރައީސް ސޯލިހު މަސައްކަތް ފެށީ ޕްރައިމެރީގައި އެމަނިކުފާނަށް ވޯޓު މަދުވެދާނެކަމަށް ބެލެވިގެން ކަމަށެވެ. ވަކި ކުރި މެމްބަރުންނަކީ އެއީ އެމްޑީޕީގެ ގިނަ ދުވަސް ވީ، ޕާޓީގެ އަސްލު މެމްބަރުންކަމަށް ރައީސް ނަޝީދު ވިދާޅުވި އެވެ.

ދަފްތަރުގައި ހުރި މައްސަލަތައް ހައްލުކޮށް، ސާފު ކުރުން މުހިންމު ނަމަވެސް ރައީސް ސޯލިހު އިސް ކުރެއްވީ އަމިއްލަ މަސްލަހަތުކަން ދޭހަވާ މޭރުމަކުން ރައީސް ނަޝީދު ވާހަކަ ދެއްކެވި އެވެ.

ރައީސް ނަޝީދު ރައީސް ސާލިހަށް ތުހުމަތުތަކެއް އަމާޒުކުރެއްވި އިރު، އެމްޑީޕީގެ ޗެއަރޕާސަންގެ ނައިބުގެ މަގާމުގައި ހުންނަވާ އިބްރާހިމް ވަހީދުވަނީ އެ ޕާޓީގެ އަމިއްލަ ދަފްތަރުގައި ސާޅީސް ހާހަށްވުރެ ގިނަ އެހެނިހެން ޕާޓީތަކާއި ވަކި ޕާޓީއެއްގައި އިލެކްޝަންސްގެ ދަފްތަރުގައި ރެޖިސްޓަވެފައި ނުވާ މެމްބަރުން ތިބި ކަމަށް ވިދާޅުވެފައެވެ.