ޕްލާސްޓިކް ކޮތަޅުން ޓެކްސް ދެއްކުމުގެ އުސޫލު މޯލްޑިވްސް އިންލެންޑް ރެވަނިއު(މީރާ) އިން އާންމުކޮށްފިއެވެ.
މީރާއިން ޝާއިއުކޮށްފައިވާ ލިއުމުގައި ވާގޮތުން، ޕްލާސްޓިކް ކޮތަޅުގެ ފީ ނަގަން ފަށާނީ އޭޕްރިލް މަހުގެ 18 ވަނަ ދުވަހުގެ 12:00 އިން ފެށިގެންނެވެ. ބުނެފައިވާގޮތުން ޕޮއިންޓު އޮފް ސޭލްގައި ވިއްކާ ކޮތަޅުން، ފީ ނަގަން ލާޒިމުވަނީ މުދަލާއި ހިދުމަތުގެ އަގުން ޓެކްސް ނެގުމުގެ ގަވައިދުގެ ދަށުން ކޮތަޅުން ޖީއެސްޓީ ލާޒިމާ ވަގުތުގައިކަމަށެވެ.
މީރާ އިން ބުނެފައިވާގޮތުން، ޖީއެސްޓީ ނުނަގާ ތަކެއްޗަށާއި ހިދުމަތްތައް ދިނުމުގައިވެސް ބޭނުންކުރާ ކޮތަޅުތަކުން ކަނޑައެޅިފައިވާ ފީ ނަގާނެކަމަށެވެ. އަދި ވިޔަފާރިތަކުން ފޯރުކޮށްދޭ ކޮންމެ ޕްލާސްޓިކް ކޮތަޅަކަށް ފީއެއްގެ ގޮތުގައި 2 ރުފިޔާ ނަގަންވާނެކަމަށް ބުނެފައިވެއެވެ. މީރާއިން ބުނެފައިވާގޮތުން ކަސްޓަމަރުންގެ އަތުން މި ފީ ނެގުމަކީ ޖީއެސްޓީއަށް ރެޖިސްޓަރކޮށްފައިވާ ފަރާތްތަކުގެ ޒިންމާއެކެވެ.
Regulation on levying plastic bag fee by persons registered for GST has been published and it is available on our website: https://t.co/8Nbx0UNpaC pic.twitter.com/l9hBEr7GDp
— Maldives Inland Revenue Authority (@MIRAmaldives) February 23, 2023
ދޫ ކުރާ ޕްލާސްޓިކް ކޮތަޅުގެ ފީ އާއި ގުޅޭ މައުލޫމާތު މީރާ އާއި ހިއްސާ ނުކުރާނަމަ ދިނުމަށް ކަނޑައެޅިފައިވާ އަދަބުވެސް ގަވައިދުގައި ބަޔާންކޮށްފައިވެއެވެ.
އެގޮތުން އެ މައުލޫމާތުތައް މީރާއަށް ފޯރުނުކޮށްދޭނަމަ، ފީ ނެގޭ މުއްދަތުގައި ދައްކަންޖެހޭ އަދަދުގެ ފަސް އިންސައްތައިން ޖޫރިމަނާ ކުރާނެކަމަށް ބުނެފައިވެއެވެ. އަދި މައުލޫމާތު ފޯރުނުކޮށްދީ ހިނގާ ކޮންމެ ދުވަހަކަށް 50 ރުފިޔާއަށްވުރެ ބޮޑު ނޫން އަދަދަކުން ޖޫރިމަނާ ކުރެވިގެންދާނެކަމަށް ބުނެފައިވެއެވެ.