މި އަހަރުގެ މިހާތަނަށް އައި ފަތުވެރިންގެ އަދަދު މިލިއަނަކާއި ގާތަށް

މިއަހަރުގެ މިހާ ހިސާބަށް ރާއްޖެ އައި ފަތުރުވެރިންގެ އަދަދު ނުވަ ލައްކައަށް އަރައިފިއެވެ.

ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާ ގޮތުގައި ޖޫން މަހުގެ 25 ވަނަ ދުވަހުގެ ނިޔަލަށް ރާއްޖެއަށް މިދިޔަ އަހަރުގެ މިހާތަނާ އަޅާކިޔާއިރު 14 އިންސައްތަ ފަތުރުވެރިން އިތުރަށް އައިސްފައިވެއެވެ. އެއީ ލައްކައަކަށްވުރެ ގިނަ ފަތުރުވެރިންނެވެ. މިދިޔަ އަހަރުގެ އެ މިލިއަން ފަތުރުވެރިން ހަމަވީ އޮގަސްޓް މަހުގެ ތެރޭގައި ނަމަވެސް މިއަހަރުގެ ޖުލައި މަހުގެ ތެރޭގައި އެއް މިލިއަން ފަތުރުވެރިން ހަމަވުމުގެ ފުރުސަތު އެބަ އޮތެވެ.

މިއަހަރުގެ ފުރަތަމަ ހަަރު މަހުގެ ތެރޭގައި ރާއްޖެއަށް ގިނަ އަދަދެއްގެ ފަތުރުވެރިން އައި ނަމަވެސް މެއި މަހުން ފެށިގެން ފަތުރުވެރިން އަންނަ މިންވަރު ވަނީ މަދުވެއެވެ.

މިއަހަރުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން އައިސްފައިވަނީ އިންޑިއާ އަދި ރަޝީޔާއިންނެވެ. ދެން އެންމެ ގިނަ ފަތުރުވެރިން ރާއްޖެ އައިސްފައިވަނީ އިންގިރޭސި ވިލާތުންނެވެ. ލިސްޓުގައި ދެން ހިމެނެނީ އިޓަލީ އަދި ޖަރުމަނުގެ އިތުރުން ޗައިނާއެވެ.

ރާއްޖެއަށް ދުވާލަކު ޒިޔާރާތްކޮށްފައިވަނީ އެވްރެޖެކޮށް 5،000 ފަތުރުވެރިންނެވެ.

ޓޫރިޒަމް މިނިސްޓްރީން ލަފާކޮށްފައި ވަނީ މިއަދު ރާއްޖެއަށް 1.8 މިލިއަން ފަތުރުވެރިން އަންނާނެ ކަމަށެވެ. އެކަމަކު ކުރިޔަށް އޮތީ ހައި ސީޒަންކަމަށްވުމާއި އެކު އަހަރު ނިމޭއިރު ރާއްޖެއަށް އައި ފަތުރުވެރިންގެ އަދަދު ދެ މިލިއަނަށްް އަރާނެކަމަށް ބެލެވެ އެވެ.