ކުރިއަށް އޮތް ރިޔާސީ އިންތިހާބުގައި ދިވެހިރާއްޖޭގެ ވެރިކަމަށް ގެނަން އެންމެ ރަނގަޅު ކެނޑިޑޭޓަކީ ޖުމްހޫރީ ޕާޓީގެ ރިޔާސީ ކެނޑިޑޭޓު ގާސިމް އިބްރާހިމްކަމަށް މަޖިލީހުގެ ތިމަރަފުށީ ދާއިރާގެ ކުރީގެ މެމްބަރު މުހައްމަދު މުސްތަފާ ވިދާޅުވެއްޖެއެވެ.
ގާސިމްގެ އިސްނެންގެވުމުގެ މަތިން އެމްއެންޕީއާއިއެކު މަޝްވަރާކުރުމަށްފަހު އެކުގައި މަސައްކަތްކުރުމަށް އެއްބަސްވުމެއް ގާއިމުކުރުމަށްފަހު، ގާސިމް އަދި އެމްއެންޕީގެ ރިޔާސީ ކެނޑިޑޭޓު ރިޓަޔާޑް ކާނަލް މުހައްމަދު ނާޒިމްވަނީ ޑިމޮކްރެޓްގެ މެމްބަރެއްގެ ގޮތުގައި ހުންނަވާ މަޖިލީހުގެ ރައީސް މުހައްމަދު ނަޝީދާއިއެކުވެސް ބައްދަލުވުމެއް ކުރިއަށް ގެންގޮސް، 2023 ގެ އިންތިހާބުގައި އެއް ކެނޑިޑޭޓަކު ނެރުމަށް އިއްތިފާގުވެފައެވެ. އަދި ކުރިއަށް އޮތް ދުވަސްތަކުގެ ތެރޭގައި އެމްއާރްއެމް އަދި ޕީޕީއެމްއާއިއެކުވެސް މަޝްވަރާތައް ކުރިއަށް ގެންދާނެކަމަށްވެސް އަލަށް އުފެދިފައިވާ އެމްއެންޕީ ޑިމޮކްރެޓްސް އަދި ޖޭޕީގެ ކޯލިޝަނުންވަނީ މީޑިއާތަކާއި މައުލޫމާތު ހިއްސާކޮށްފައެވެ.
އެއް ކެނޑިޑޭޓަކު ނެރުމާއިމެދު ސިޔާސީ މައިދާނުގައި ދެކެވެމުންދާ ވަހާކަތަކުގެ އަޑުތައް ގަދަވަމުންދާއިރު، މުސްތަފާވަނީ އޭނާ ދެކިވަޑައިގަންނަވާ ގޮތް ހިއްސާކުރައްވާފައެވެ. އޭނާ ވިދާޅުވީ، ދިވެހިރާއްޖޭގެ ވެރިކަމުގެ ތަހުތު ހާވާލުކުރެއްވުމަށް އެންމެ އެކަށީގެންވާ ލީޑަރަކީ ގާސިމްކަމަށް ދެކިވަޑައިގަންނަވާކަމަށެވެ. އޭނާ ވަނީ އެގޮތަށް ދެކިވަޑައިގަންނަވާ ސަބަބުވެސް ހިއްސާކުރައްވާފައެވެ. އެގޮތުން ގާސިމްއަކީ އެމަނިކުފާނަށް ލިބިވަޑައިގެންނެވި އަނިޔާތަކަށް އަނިޔާވެރިވި ފަރާތާއިމެދުވެސް ހަސަދަވެރިކަމެއް ގެންގުޅުއްވާ ފަރާތެއް ނޫންކަމަށް އޭނާ ފާހަގަކުރެއްވިއެވެ.
veri kamah enme laaigu beyfulhakee Qasim ibrahim.Qasim eii eyna ah meehaku aniyaa eh dhinas ekan hithuga alhaagen ulhey meeheh noon.Qasim akee Sarukaareh hingumuge furihama Thajuribaa huri beyfulheh.Qasim huree Governor kamaai Finance minister kamaai Majilise ge Raees Kan kohfa.
— Mohamed Musthafa (@Thimarafushi) July 20, 2023
ގާސިމްއަކީ މާޒީ ހިތުއަޅުއްވައިގެން ހުންނެވި ބޭފުޅެއް ނޫންކަމަށް ފާހަގަކުރައްވާ މުސްތަފާވަނީ އެމަނިކުފާނު ވެރިކަމަށް ގެނައުން ރަނގަޅުކަމަށް ދެކިވަޑައިގަންނަވާ އިތުރު ސަބަބުތައްވެސް ހިއްސާކުރައްވާފައެވެ. އެގޮތުން ގާސިމްއަކީ ސަރުކާރެއް ހިންގުމުގެ ފުރިހަމަ ތަޖުރިބާ ލިބިވަޑައިގެން ހުންނެވި ފަރާތެއްކަމަށް އޭނާ ފާހަގަކުރެއްވިއެވެ. އޭނާ ވިދާޅުވީ، ގާސިމްވަނީ ދިވެހިރާއްޖޭގެ މަރުކަޒީ ބެންކުގެ ގަވަނަރުގެ މަގާމު އަދާކުރައްވާފައިކަމަށެވެ. އަދި އޭގެ އިތުުރުން އެމަނިކުފާނުވަނީ ދިވެހިރާއްޖޭގެ ފިނޭންސް މިނިސްޓަރުކަމުގެ މަގާމުގެ އިތުރުން މަޖިލީހުގެ ރައީސްކަމުގެ މަގާމުވެސް އަދާުކުރައްވާފައިކަމަށްވުމުން އެތައް ތަޖުރިބާތަކެއް ހާސިލުކުރައްވާފައިވާނެކަމަށް އޭނާ ސިފަކުރެއްވިއެވެ.
އެމްއެންޕީ އަދި ޑީމޮކްރެޓްސް އާއި ޖޭޕީއިން އެއް ކެނޑިޑޭޓަކު ނެރުމަށް އެއްބަސްވެފައިވާއިރު، އެ ކެނޑިޑޭޓަކީ ކޮން ބޭފުޅެއްކަމަށް އަދި ހިއްސާކުރައްވާފައިނުވެއެވެ. އެ މައުލޫމާތުތައް ހިއްސާކުރެއްވޭނީ ޕީޕީއެމް އަދި އެމްއާރްއެމްއާއިއެކުވެސް މަޝްވަރާތައް ކުރިއަށް ގެންދިއުމަށްފަހުކަމަށް މީޑިއާތަކަށް މައުލޫމާތު ދީފައިވާއިރު، ޕީޕީއެމްއިންވަނީ އެ ޕާޓީއާއި އެކަމާއި ގުޅޭގޮތުން ސުވާލުކުރެވެމުންދިއުމާއިއެކު ބަޔާނެއް ނެރިފައެވެ. ޕީޕީއެމްއިންވަނީ ގުޅިފައިވާ އިދިކޮޅު ޕާޓީތަކުގެ ކެނޑިޑޭޓެއްގެ ގޮތުގައި ރައީސް ޔާމީން އެކަށީގެންވާކަމަށް އަދި އެގޮތުގެ މަތިން ކަންކަން އިންތިޒާމުކުރުމަށް އެދޭކަމަށާއި ރައީސް ސާލިހުގެ ވެރިކަން ނިމުމަކަށް ގެނައުމަށް ކުރަމުންދާ މަސައްކަތްތަކަށް ޝުކުރުވެރިވާކަމަށް ބުނެފައެވެ.