އިމްރާން ފުލުހުންގެ ދިފާއުގައި: އަގުވެއްޓުމަކީ ބަލައިގަނެވޭނެކަމެއް ނޫން!

ސިފައިންނާއި ފުލުހުންގެ އަގުވައްޓާލުމަށް ކުރެވޭ މަސައްކަތަކީ ބަލައިގަނެވޭނެ ކަމެއް ނޫންކަމަށް ހޯމް މިނިސްތަރު އިމްރާން އަބްދުﷲ ވިދާޅުވެއްޖެއެވެ.

އޭނާ ކުރެއްވި ޓުވީޓެއްގައި ވިދާޅުވީ ސިފައިންގެ ބޭކަލަކަށް ނުވަތަ ފުލުހުންގެ އޮފިސަރަކަށް ގޯސްކޮށް ކަމެއް ކުރެވިއްޖެ ނަމަ އެކަން ބަލާ އަޅަންޖެހޭ ފިޔަވަޅު އެޅޭނެކަމަށެވެ.

ސިފައިންގެ ބޭކަލަކަށް ނުވަތަ ފުލުހުންގެ އޮފިސަރަކަށް ގޯސްކޮށް ކަމެއް ކުރެވިއްޖެ ނަމަ އެކަން ބަލާ އަޅަންޖެހޭ ފިޔަވަޅު އެޅޭނެ.

ނަމަވެސް ސިފައިންނާއި ފުލުހުންގެ އަގުވައްޓާލުމަށް ކުރެވޭ މަސްކަތަކީ ބަލައިގަނެވޭނެ ކަމެއް ނޫން.

— Imran Abdulla (@ShimranAb) July 21, 2023

ނަމަވެސް ސިފައިންނާއި ފުލުހުންގެ އަގުވައްޓާލުމަށް ކުރެވޭ މަސައްކަތަކީ ބަލައިގަނެވޭނެ ކަމެއް ނޫންކަމަށް އިމްރާން ވަނީ ވިދާޅުވެފައެވެ.

ފުލުހުން އެކަށީގެންނުވާ ބާރުގެ ބޭނުންކުރާކަމުގެ ތުހުމަތާއި، އަދި ގާނޫނާއި ހިލާފުވާކަމުގެ ތުހުމަތުވެސް ކުރެވެމުން ދަނިކޮށް، ދާދި ފަހުން އިދިކޮޅުގެ ހަރަކާތެއް ކަވަރުކުރަން ގޮސް ތިބި ނޫސްވެރިންނަށް ތަކުރާރުކޮށް ހުރަސް އެޅުމަށް ފަހު، ނޫސްވެރިންނަށް އަނިޔާވާ ގޮތަށް ފުލުހުން އަމަލު ކުރި ވީޑިއޯއެއް ސޯޝަލް މީޑިއާގައި ދަނީ ދައުރުވަމުންނެވެ. އެކަމަށް ގިނަ ބައެއްގެ ފާޑުކިއުންތައް އަމާޒުވެފައި ވަނިކޮށް ފުލުހުން ބުނީ މި މައްސަލަ ބަލަމުންދާކަމަށެވެ.

މި މައްސަލައިގައި ޕޮލިސް ކޮމިޝަނަރު މުހައްމަދު ހަމީދު ވިދާޅުވީ، ނޫސްވެރިންނަށް އަނިޔާވާ ގޮތަށް ފުލުހުން އަމަލު ކުރި މައްސަލަ ބެލުމަށް އެސްއޯ ފުލުހުންގެ ޑިޕާޓްމަންޓަށް އަންގާފައިވާ ކަމަށެވެ. އަދި ތުހުމަތު ކުރެވޭ ފުލުސް މީހާ މަސްއޫލިއްޔަތުތަކުން އެކަހެރި ކުރުމަށް އަންގާފައިވާކަމަށް ވެސް ވިދާޅުވިއެވެ.

މީގެ ކުރިން ވެސް އިދިކޮޅުގެ އެކި މުޒާހަރާތައް ކަވަރު ކުރުމުގެ ތެރޭގައި ނޫސްވެރިންނަށް ވަނީ އެކިވަރުގެ އަނިޔާތައް ލިބިފައެވެ. އަދި މުޒާހަރާތަކުގެ ބައިވެރިންނަށް ފުލުހުން އިހާނެތިކޮށް ކަންތައްކުރި ހާލަތްތައްވެސް ދިޔައެވެ.