ދިވެހިރާއްޖޭގެ އިންތިހާބީ ތާރީހަށް ބެލުމުން ދެވަނަ ބުރެއްގައި ރައީސް އިބްރާހިމް މުހައްމަދު ސާލިހަށް 2023ގެ ރިޔާސީ އިންތިހާބު ކާމިޔާބުކުރެއްވޭ މަންޒަރު ފެންނަކަމަށް ޔޫތު މިނިސްޓަރު އަހުމަދު މަހްލޫފު ވިދާޅުވެއްޖެއެވެ.
ރިޔާސީ އިންތިހާބުގެ ފުރަތަމަ ބުރުގައި އެމްޑީޕީގެ ކެންޑިޑޭޓު ރައީސް ސާލިހުގެ މައްޗަށް ޕީއެންސީގެ ކެންޑިޑޭޓު ޑރ މުހައްމަދު މުއިއްޒު ކުރި ހޯއްދަވާފައިވާއިރު، މަހްލޫފްވަނީ އަދިވެސް އުންމީދެއް އޮތްކަމަށް ސިފަކުރައްވާ ޕޯސްޓެއްކުރައްވާފައެވެ. އޭނާ ވިދާޅުވީ، 2023ގެ ރިޔާސީ އިންތިހާބުގެ ނަތީޖާއަކީ އޭނާގެ ސިޔާސީ ހަޔާތުގައި ފެނިގެންދިޔަ އެންމެ ހައިރާން ކުރުވަނިވި ނަތީޖާކަމަށެވެ.
އެހެންނަމަވެސް ނަތީޖާގެ ސަބަބުން ފެނިގެންދާ ހަގީގަތް ގަބޫލުކުރައްވާކަމަށާއި އެހެންކަމުން އެ ހަގީގަތް ހަޖަމު ކުރެއްވުމަށްފަހު ހެދިފައިވާ ގޯސްތައް ރަނގަޅުކުރައްވައިގެން ރައީސް ސާލިހަށް ރިޔާސީ އިންތިހާބު ކާމިޔާބުކުރެއްވޭނެކަމަށް މަހުލޫފް ވިދާޅުވިއެވެ.
މިނަތީޖާއަކީ ސިޔާސީ ހަޔާތުގައި އަޅުގަނޑަށް އެންމެ ބޮޑު ހައިރާންކަމެއް ލިބުނު ފަހަރު.
މިހަގީގަތް ގަބޫލުކޮށް އަދި ހަޖަމުކޮށްގެން، ހެދިފައިހުރި ގޯސްތައް ރަނގަޅުކޮށް ދެވަނަ ބުރުގައި ރައީސް @ibusolih އަށް މިއިންތިޚާބު ކާމިޔާބުކުރެވޭނެ. إِنْ شَاءَ ٱللَّٰهُ
2008 ވަނަ އަހަރުގެ ފުރަތަމަ… pic.twitter.com/AB48kNqBGw
— Ahmed Mahloof (@AhmedMahloof) September 10, 2023
މަހުލޫފް ވިދާޅުވީ، 2008 ވަނަ އަހަރުގެ ބޭއްވި ރިޔާސީ އިންތިހާބުގެ ފުރަތަމަ ބުރުން ރައީސް މައުމޫންއަށް ލިބިވަޑައިގަތީ 45 އިންސައްތަ ކަމަށާއި އެ އިންތިހާބުގެ ފުރަތަމަ ބުރުގައި ރައީސް ނަޝީދަށް ލިބިވަޑައިގަތީ 25 އިންސައްތަކަމަށެވެ. އެހެންނަމަވެސް ދެވަނަ ބުރުގައި ރައީސް ނަޝީދު އިންތިހާބު ކާމިޔާބުކުރެއްވިކަމަށް އޭނާ ފާހަގަކުރެއްވިއެވެ.
އޭނާ ވިދާޅުވީ، 2013 ވަނަ އަހަރުގެ އިންތިހާބުގެ ފުރަތަމަ ބުރު ކާމިޔާބު ކުރެއްވީ ރައީސް ނަޝީދުކަމަށެވެ. އެގޮތުން 47 އިންސައްތަ ވޯޓު ލިބިވަޑައިގެންކަމަށާއި އެހެންނަމަވެސް ދެވަނަ ބުރުގައި ރައީސް ޔާމީން އެ އިންތިހާބު ކާމިޔާބުކުރެއްވިކަމަށް އޭނާ ވިދާޅުވިއެވެ.
މަހްލޫފު ވިދާޅުވީ، ތާރީހަށް ބެލުމުން ދެވަނަ ބުރެއްގައި ރައީސް ސާލިހަށް އިންތިހާބު ކާމިޔާބުކުރެވޭނެކަމަށް ފެނިގެންދާނަކަމަށެވެ. އެހެންކަމުން އެންމެންވެސް އެމަނިކުފާނަށް އިންތިހާބު ކާމިޔާބުކޮށްދެއްވުމަށް ގަދަ އަޅައި މަސައްކަތްކުރެއްވުމަށް އޭނާ އެދިވަޑައިގަތެވެ.
advertisment